इंडिया आघाडीमध्ये सध्या सत्तेसाठी संघर्ष सुरूच आहे. आता पश्चिम बंगालच्या मुख्यमंत्री आणि तृणमूल काँग्रेसच्या नेत्या ममता बॅनर्जी यांनी पुन्हा एकदा काँग्रेसच्या कामगिरीवर प्रश्नचिन्ह उपस्थित केले आहे. अलीकडेच, हरियाणा आणि महाराष्ट्र निवडणुकीत आघाडीच्या खराब कामगिरीबद्दल त्यांनी असंतोष व्यक्त केला आहे आणि संधी दिल्यास त्या इंडिया आघाडीची मुख्य जबाबदारी घेण्यास तसेच विरोधी पक्ष म्हणून भूमिका सांभाळण्यास तयार असल्याचे संकेत दिले आहेत.
तृणमूल खासदार कीर्ती आझाद यांनी ममता बॅनर्जी यांची इंडिया आघाडीच्या प्रमुखपदी नियुक्ती करण्याची मागणी केल्यानंतर ममता बॅनर्जी यांनी ही प्रतिक्रिया दिली आहे.ममता बॅनर्जी म्हणाल्या आहेत की, बंगालच्या मुख्यमंत्री म्हणून आपली जबाबदारी संभाळत इंडिया आघाडी चालवण्याची दुहेरी जबाबदारी त्या सांभाळू शकतील. एका टीव्ही चॅनलशी बोलताना ममता बॅनर्जी म्हणाल्या आहेत की , “मीच इंडिया आघाडीची सुरवात केली होती.आता ती व्यवस्थापित करण्याची जबाबदारी मोर्चाचे नेतृत्व करणाऱ्यांवर आहे. जर ते चालू शकत नाहीत, तर मी काय करू? असे म्हणत त्यांनी काँग्रेसवर निशाणा साधला आहे.
भाजपला विरोध करण्यासाठी स्थापन करण्यात आलेल्या इंडिया आघाडीमध्ये दोन डझनहून अधिक विरोधी पक्षांचा समावेश आहे. मात्र, पक्षांतर्गत मतभेद आणि समन्वयाच्या अभावामुळे अनेकवेळा त्यांच्यावर टीका झाली आहे.तर अनेक पक्ष या आघाडीतून बाहेरही पडले आहेत.
महाराष्ट्रात विधानसभा निवडणुकीत भाजपने चमकदार कामगिरी केली आणि विक्रमी जागा जिंकल्या, तर काँग्रेसची कामगिरी फारच खराब दिसून आली.तर इंडिया आघाडीतील सहभागी महाराष्ट्रातील इतर पक्ष म्हणजे उद्धव ठाकरे गट आणि शरद पवार गट यांनाही पराभवाला सामोरे जावे लागले आहे. महाराष्ट्रात भाजपच्या नेतृत्वाखालील सत्ताधारी महायुती आघाडीने मोठा विजय नोंदवला, तर झारखंडमध्ये जेएमएमच्या उत्कृष्ट कामगिरीमुळे इंडिया आघाडीने जोरदार पुनरागमन केले.
संसदेच्या हिवाळी अधिवेशनात विरोधी गटाच्या कार्यपद्धतीवरून इंडिया आघाडीमध्ये सदस्यांमध्ये मोठे मतभेद दिसून आले आहेत. तृणमूल काँग्रेस आणि समाजवादी पक्षाच्या खासदारांनीही गौतम अदानी लाचखोरीप्रकरणी काँग्रेसबरोबर विरोध करायचे टाळले. कारण तृणमूल काँग्रेसच्या मते महागाई, बेरोजगारी आणि विरोधी राज्यांना मिळणारा निधी वंचित ठेवण्यासारख्या मुद्द्यांवर चर्चा करायची आहे, तर समाजवादी पक्षाच्या नेत्यांना संभल हिंसाचाराचा मुद्दा विरोधी पक्ष म्हणून पुढे रेटायचा होता.
