जम्मू-काश्मीरच्या कुलगाम जिल्ह्यात आज, गुरुवारी झालेल्या चकमकीत सैन्याने 5 जिहादी दहशतवाद्यांना कंठस्नान घातले आहे. दरम्यान गोळीबारात 2 जवानही जखमी झाले असून त्यांना उपचारासाठी रुग्णालयात नेण्यात आले आहे. दहशतवादी आणि सुरक्षा दलांमध्ये ही चकमक कुलगाम जिल्ह्यातील बेहीबाग पीएसच्या कद्दर गावात झाली आहे.
यासंदर्भातील माहितीनुसार सुरक्षालदांना कुलगाममध्ये दहशतवादी लपून बसल्याची गोपनीय माहिती मिळाली होती. गुप्तहेरांकडून मिळालेल्या टीपनंतर भारतीय सैन्य आणि जम्मू-काश्मीर पोलिसांनी या परिसरता शोध मोहिम हाती घेतली. सर्च ऑपरेशन दरम्यान कुलगाम जिल्ह्यातील कद्दर भागात जवानांना काही संशयास्पद हालचाली दिसून आल्या. यावेळी जवानांनी संशयितांना शरणागती पत्करण्याचे आवाहन केले. परंतु, संशयितांनी सैन्यावरच गोळीबार सुरू केला. यात 2 जवान जखमी झालेत. त्यानंतर जवानांनी तत्काळ पोजिशन घेत जिहादी दहशतवाद्यांना प्रत्युत्तर दिले. यामध्ये आतापर्यंत 5 दहशतवादी ठार झाले असून सैन्याने या संपूर्ण परिसराला वेढा घातला आहे. दरम्यान या परिसरात अजूनही गोळीबाराचे आवाज येत असल्याची माहिती सूत्रांनी दिली आहे.
गेल्या काही दिवसांत जम्मू-काश्मीरमध्ये दहशतवादी घटना घडत होत्या, त्यानंतर सुरक्षा दलांनी खोऱ्यात दहशतवादविरोधी कारवाया तीव्र केल्या आहेत. दोन महिन्यांपूर्वी, 28 ऑक्टोबर रोजी जम्मूच्या अखनूर भागात सुरक्षा दलांनी तीन दहशतवाद्यांचा खात्मा केला होता. त्यानंतर दहशतवाद्यांनी लष्कराच्या ताफ्यावर हल्ला केला होता, त्यानंतर सुरक्षा दलांनी परिसरात ऑपरेशन सुरू केले. या कारवाईत तीन दहशतवादी मारले गेले होते.
