संसदेच्या हिवाळी अधिवेशनाच्या शेवटच्या दिवशी, आज दोन्ही सभागृहे पुन्हा सुरू झाल्यानंतर काही वेळातच अनिश्चित काळासाठी तहकूब करण्यात आली आहे. भाजप आणि काँग्रेस खासदारांनी आंबेडकरांवरील टिप्पणीवरून केलेल्या निषेधादरम्यान झालेल्या हाणामारीमुळे केंद्र आणि विरोधी पक्षाच्या खासदारांमध्ये झालेल्या गोंधळामुळे लोकसभा आणि राज्यसभा तहकूब करण्यात आली आहे .
लोकसभेत विरोधकांच्या गदारोळात, एक देश, एक निवडणुकीशी संबंधित १२९ वी घटना दुरुस्ती विधेयक संयुक्त संसदीय समितीकडे पाठवण्यात आले. यानंतर लोकसभेचे कामकाज अनिश्चित काळासाठी तहकूब करण्यात आले. लोकसभेचे कामकाज सकाळी अकरा वाजता सुरू होताच विरोधकांनी डॉक्टर आंबेडकर यांच्या मुद्द्यावरून गदारोळ सुरू केला होता. विरोधी सदस्य सभागृहाच्या मध्यभागी पोहोचले. यावेळी सभागृह नेते पंतप्रधान नरेंद्र मोदीही उपस्थित होते. विरोधी सदस्यांच्या घोषणाबाजीत केंद्रीय कायदा मंत्री अर्जुन राम मेघवाल यांनी घटना दुरुस्ती विधेयक संसदेच्या संयुक्त कार्य समितीकडे पाठवण्याचा प्रस्ताव मांडला. या गदारोळातच हा प्रस्ताव आवाजी मतदानाने मंजूर करून सभागृहाची परवानगी देण्यात आली. जेपीसीमध्ये 27 सदस्य आहेत. त्यापैकी 12 राज्यसभेतील आहेत.
यादरम्यान लोकसभा अध्यक्षांनी सदस्यांना संसदीय परंपरा आणि सन्मानाचा आदर करण्याचे आवाहन केले. संसद परिसर धरणे किंवा निदर्शनासाठी नाही, असा इशारा त्यांनी सदस्यांना दिला. यासाठी कारवाईही होऊ शकते. असेही नमूद केले. यानंतर वंदे मातरमसह कामकाज अनिश्चित काळासाठी तहकूब करण्यात आले आहे .
आज भाजप खासदारांनी संसद भवन संकुलातील महात्मा गांधी पुतळ्याजवळ निदर्शने केली, तर विरोधी खासदारांनी विजय चौकातून संसदेपर्यंत मोर्चा काढला होता.
आज दिवसाच्या सुरवातीला सभागृहामध्ये काँग्रेस खासदार के सुरेश यांनी केंद्रीय गृहमंत्री अमित शाह यांनी केलेल्या डॉक्टर आंबेडकर यांच्यावरील कथित वादग्रस्त वक्तव्याबाबत लोकसभेत स्थगन प्रस्तावाची सूचना दिली.
“डॉ. आंबेडकरांचा वारसा कोणत्याही राजकीय पक्षापुरता मर्यादित नाही; तो संपूर्ण देशाचा आहे.”असे म्हणत सुरेश यांनी सभागृहाला कडक भूमिका घेण्याचे आवाहन केले आणि त्यांच्या विधानांसाठी गृहमंत्र्यांनी बिनशर्त माफी मागावी अशी मागणी केली आहे.
