उद्धव ठाकरे महाविकास आघाडीत गेले, अजित पवार महायुतीत आले. राजकारण हे अनाकलनीय असून इथे कधीही काहीही होऊ शकते असे प्रतिपादन मुख्यमंत्री देवेंद्र फडणवीस यांनी केले आहे. नागपुरात झालेल्या जिव्हाळा पुरस्कार वितरण कार्यक्रमात सुप्रसिद्ध प्रवचनकार आणि ज्येष्ठ पत्रकार विवेक घळसासींनी घेतलेल्या मुलाखतीत फडणवीस बोलत होते.
नुकत्याच झालेल्या महाराष्ट्राच्या विधानसभा निवडणुकीत महायुतीने प्रचंड बहुमतासह विजय मिळवला आहे. महायुतीच्या या विजयाचे श्रेय राष्ट्रीय स्वयंसेवक संघाला देखील दिले जात आहे. याच पार्श्वभूमीवर महायुतीचे विरोधक आणि राष्ट्रवादी काँग्रेस पार्टी शरदचंद्र पवार या पक्षाचे प्रमुख शरद पवार यांनी आरएसएसचे कौतुक करत म्हटंले होते की,“विधानसभा निवडणुकीत संघाने प्रचाराची योग्य रणनीती आखली होती”याबाबत मुख्यमंत्र्यांची सूचक प्रतिक्रिया समोर आली आहे. .
याप्रसंगी फडणवीस म्हणाले की, 2019 ते 2024 पर्यत घडलेल्या घडामोडीतून मला “नेव्हर से नेव्हर’ ही एक गोष्ट लक्षात आली. म्हणजे कुठलीही गोष्ट होणार नाही, असे समजून कधी चालायचे नाही. झाले पाहिजे असे नाही. असे व्हावे असे बिलकुल नाही. किंवा ते होणेही फार चांगले आहे या मताचा मी नाही. शेवटी राजकारणात हे लक्षात ठेवले पाहिजे की, खूप ठामपणे असे होणारच नाही, असे आपण म्हणतो. मात्र. त्यावेळी राजकीय परिस्थिती तुम्हाला कुठे नेवून बसवेल याचा काही भरवसा नसतो असे फडणवीस यांनी सांगितले.
माझ्यावर अनेकदा मर्यादाहीन पातळी सोडून वैयक्तिक टीका झाली. तरी संयमी राहिलो कारण इतिहास तुम्ही काय केले हे लक्षात ठेवते. त्यामुळे टीकाकारांचा विचार न करता काम करीत राहातो. माझ्यावर टीका करणारे आज कुणाच्या स्मरणात नाहीत. मला राग तेव्हाच येतो जेव्हा मला भूक लागते. त्यामुळे खायला दिले की राग शांत होतो असेही फडणवीस मिश्कीलपणे म्हणाले आहेत.
शरद पवारांवर बोलताना फडणवीस म्हणाले की, शरद पवार अतिशय चाणाक्ष आहेत. फेक नॅरेटीव्हचे वातावरण पंक्चर करणारी शक्ती कोण याचा त्यांनी निश्चितच अभ्यास केला असेल. ही शक्ती नियमित राजकारण करणारी नव्हे तर राष्ट्रकारण करणारी शक्ती आहे. हे त्यांच्या लक्षात आल्याने त्यांनी राष्ट्रीय स्वयंसेवक संघाचे कौतुक केले असावे असे वाटते. शेवटी प्रतिस्पर्ध्याचेही कौतुक करावे लागते.
