आज सकाळी पुणे नाशिक महामार्गावर एसटी बस, ट्रक आणि मॅक्झिमो व्हॅनमध्ये मोठा अपघात झाला आहे.या दुर्घटनेत 9 जणांचा मृत्यू झाला असून काहीजण गंभीर जखमी झाले असल्याची माहिती समोर आली आहे.या दुर्दैवी घटनेनंतर परिसरात हळहळ व्यक्त होत आहे.
समोर आलेल्या माहितीनुसार, पुणे-नाशिक महामार्गावरील नारायणगावजवळ तीन वाहनांमध्ये भीषण अपघात झाला असून यामध्ये 9 जणांचा दुर्दैवी अंत झाला आहे. आज सकाळी दहा वाजण्याच्या सुमारास ही भयंकर घटना घडली आहे. प्रवासी वाहतूक करणाऱ्या मॅक्स ऑटो गाडीला पाठीमागून आयशर टेम्पोने जोराची धडक दिली होती. या अपघातात सात जण गंभीर जखमी झाले असून त्यांच्यावर नारायणगाव येथे खासगी रुग्णालयात उपचार सुरु आहेत. मृतांचा आकडा वाढण्याचीही भिती वर्तवण्यात येत आहे.
देवेंद्र फडणवीस यांनी ‘एक्स’वर याबाबत मृतांच्या नातेवाईकांसाठी मदतीची घोषणा केली आहे. पोस्टमध्ये त्यांनी म्हंटले आहे की, पुणे-नाशिक महामार्गावर नारायणगाव जवळ झालेल्या भीषण अपघातात 9 कामगारांचा मृत्यू झाल्याची घटना अतिशय दुर्दैवी आहे. मी त्यांना भावपूर्ण श्रद्धांजली अर्पण करतो. त्यांच्या कुटुंबियांच्या दुःखात आम्ही सहभागी आहोत. जखमींच्या प्रकृतीत लवकर सुधारणा व्हावी, अशी प्रार्थना करतो. मृतांच्या वारसांना 5 लाख रुपये आर्थिक सहाय्य मुख्यमंत्री सहायता निधीतून करण्यात येणार असल्याचे त्यांनी म्हंटले आहे.
