डोनाल्ड ट्रम्प यांनी काल सोमवारी अमेरिकेचे 47 वे राष्ट्राध्यक्ष म्हणून शपथ घेतली आहे. डोनाल्ड ट्रम्प यांच्या शपथविधी सोहळ्याला अनेक माजी राष्ट्रपती आणि सर्वोच्च न्यायालयाचे न्यायाधीश, ट्रम्प यांचे संपूर्ण मंत्रिमंडळ, त्यांच्या कुटुंबातील सर्व सदस्य तसेच अनेक देशांचे प्रमुख आणि अनेक टेक कंपन्यांचे दिग्गज उपस्थित होते. तत्पूर्वी, मावळते राष्ट्राध्यक्ष जो बायडेन आणि जिल बायडेन यांनी डोनाल्ड ट्रम्प आणि मेलानिया ट्रम्प यांचे व्हाईट हाऊसमध्ये औपचारिक स्वागत केले.
अमेरिकेचे राष्ट्राध्यक्ष म्हणून शपथ घेतल्यानंतर डोनाल्ड ट्रम्प म्हणाले आहेत की, “तुम्हा सर्वांचे खूप खूप आभार. अमेरिकेचा सुवर्णकाळ आता सुरू होत आहे. या दिवसापासून आपला देश जगभर उदयास येईल आणि चमकेल. जगातील प्रत्येक देशाला आपला हेवा वाटावा असे काम करून दाखवून. ट्रम्प प्रशासन अमेरिका फर्स्ट या धोरणावर काम करेन. आमची स्वायत्तता कायम राहील. तसेच आमचे शासन संतुलीत न्यायासाठी ओळखले जाईल अशी ग्वाही ट्रम्प यांनी यावेळी दिली आहे. आमची प्राथमिकता एक मुक्त, समृद्ध देश निर्माण करणे असेल. अमेरिका लवकरच खूप चांगल्या स्थितीत असेल. देशात बदलाचे वारे वाहत आहे. या संधीचे सोने करण्याची अमेरिकेकडे प्रचंड संधी आहे. आमच्या सरकारमध्ये, आम्ही कोणालाही आमचा गैरफायदा घेऊ देणार नाही. आमची सुरक्षा आम्ही टिकवून ठेऊ.न्याय मंत्रालयाला पक्षपाती, विषारी आणि हिंसक शस्त्र बनवण्याचे प्रयत्न बंद केले जातील. एक वैभवशाली, समृद्ध आणि स्वतंत्र देश निर्माण करणे हे आमचे प्राधान्य असेल. अमेरिका लवकरच पूर्वीपेक्षाही महान, बलवान आणि चांगला होईल असा विश्वास ट्रम्प यांनी यावेळी व्यक्त केला आहे. तसेच जगातील दहशतवादी शक्ती आणि गटांचा नायनाट केला जाईल असे त्यांनी यावेळी जनतेला आश्वासन दिले आहे.
डोनाल्ड ट्रम्प यांच्यासोबत जेडी व्हान्स यांनी अमेरिकेचे उपराष्ट्रपती म्हणून शपथ घेतली आहे. याव्यतिरिक्त, ग्रोव्हर क्लीव्हलँडनंतर ४ वर्षांच्या अंतराने व्हाईट हाऊसमध्ये परतणारे डोनाल्ड ट्रम्प हे पहिले अमेरिकन राष्ट्राध्यक्ष आहेत. ट्रम्प यांचा हा शपथविधी समारंभ त्यांच्या पहिल्या शपथविधी समारंभापेक्षा खूपच वेगळा होता.
दरम्यान अमेरिकेचे नवे राष्ट्राध्यक्ष म्हणून पुन्हा एकदा शपथ घेतल्याबद्दल पंतप्रधान मोदींनी डोनाल्ड ट्रम्प यांचे अभिनंदन केले आहे. यासंदर्भात ट्विटरवर (एक्स) जारी केलेल्या संदेशात डोनाल्ड ट्रम्प यांचे अभिनंदन करताना पंतप्रधान म्हणाले की, दोन्ही देशांच्या फायद्यासाठी आणि जगाचे चांगले भविष्य घडविण्यासाठी मी पुन्हा एकदा एकत्र काम करण्यास उत्सुक आहे. पुढील यशस्वी कार्यकाळासाठी शुभेच्छा असे मोदींनी आपल्या संदेशात नमूद केले आहे.
Congratulations my dear friend President @realDonaldTrump on your historic inauguration as the 47th President of the United States! I look forward to working closely together once again, to benefit both our countries, and to shape a better future for the world. Best wishes for a…
— Narendra Modi (@narendramodi) January 20, 2025
