Uniform Civil Code Uttarakhand : उत्तराखंड आज इतिहास रचणार आहे. आजपासून (27 जानेवारी 2024) राज्यात समान नागरी संहिता (UCC) लागू होणार आहे. आणि हा कायदा लागू करणारे हे पहिले राज्य ठरणार आहे. आजपासून राज्यात हा ऐतिहासिक कायदा लागू करण्यात येणार आहे. अधिकाऱ्यांच्या म्हणण्यानुसार, संपूर्ण उत्तराखंडमध्ये यूसीसी लागू करण्यात येणार असून, हा कायदा राज्याबाहेर राहणाऱ्या उत्तराखंडमधील लोकांनाही लागू होणार असल्याचे सांगण्यात आले आहे.

आज राज्य सचिवालयात यूसीसी पोर्टलचे अनावरण केले जाईल. उत्तराखंडचे मुख्यमंत्री पुष्कर सिंह धामी या कार्यक्रमाचे नेतृत्व करतील. एक दिवस आधी म्हणजेच काल सीएम धामी म्हणाले आहेत की, UCC धर्म, लिंग, जात किंवा समुदायाच्या आधारावर भेदभावापासून मुक्त एक सुसंवादी समाजाचा पाया स्थापित करेल.’

सीएम धामी पुढे असंही म्हणाले होते, ‘आम्ही आमची वचनबद्धता पूर्ण करत आहोत. जम्मू-काश्मीरमधील कलम 370 हटवणे हे त्याचेच एक उदाहरण आहे. राज्य सरकारने आपले काम पूर्ण केले असून जानेवारी 2025 पासून संपूर्ण राज्यात समान नागरी संहिता लागू करण्याची तयारी सुरू केली आहे.

धामी असंही म्हणाले, ‘पंतप्रधान नरेंद्र मोदी यांच्या नेतृत्वात आम्ही 2022 च्या विधानसभा निवडणुकीपूर्वी यूसीसी आणण्याचे वचन दिले होते आणि सरकार स्थापनेनंतर आम्ही ते प्राधान्याने केले आहे.’

गोव्यात UCC आधीच लागू आहे

गोव्याला भारतीय राज्यघटनेत विशेष राज्याचा दर्जा मिळाला आहे. गोव्यात 1965 पासून समान नागरी कायदा लागू आहे. हिंदू, मुस्लिम आणि ख्रिश्चनांसाठी वारसाहक्क, हुंडा आणि विवाह याबाबत एकच कायदा आहे. गोवा हे एकमेव राज्य आहे जिथे UCC लागू आहे. आता उत्तराखंड हे पहिले राज्य असेल जिथे स्वातंत्र्यानंतर समान नागरी संहिता लागू केली जाईल.

समान नागरी म्हणजेच (UCC) काय म्हणजे काय?

समान नागरी कायदा म्हणजे देशातील सर्व लोकांसाठी (प्रत्येक धर्म, जाती, लिंग) समान कायदा असणे. समान नागरी कायद्यानुसार, संपूर्ण देशासाठी समान कायद्यासह, विवाह, घटस्फोट, वारसा, दत्तक यांचे नियम सर्व धार्मिक समुदायांसाठी समान असतील. जर एखाद्या राज्यात नागरी संहिता लागू केला असेल तर विवाह, घटस्फोट, मूल दत्तक आणि मालमत्ता यासारख्या सर्व विषयांमधील प्रत्येक नागरिकासाठी समान कायदा असेल.