उत्तर प्रदेशातील प्रयागराज येथील महाकुंभमध्ये काल बुधवारी (29) चेंगराचेंगरी झाली होती. या दुर्घटनेत ५० हून जास्त जणांचा आपले प्राण गमवावे लागले.

अशातच आज दुसऱ्या दिवशी महाकुंभमध्ये पुन्हा एकदा लाग लागल्याची घटना घडली आहे. महाकुंभाच्या सेक्टर 22 मध्ये ही आग लागली असल्याची माहिती मिळत आहे. अशास्थितीत भाविक जीव वाचवण्यासाठी इकडे-तिकडे धावू लागले. या घटनेची माहिती मिळताच अग्निशमन दलाचे पथक घटनास्थळी पोहोचले असून आगीवर नियंत्रण मिळवण्याचे प्रयत्न सुरू आहेत. आगीत अनेक तंबू जळाले असल्याची माहिती मिळत आहे.

या घटनेची माहिती देताना अग्निशमन विभागाचे अधिकारी प्रमोद शर्मा म्हणाले, “आम्हाला महाकुंभाच्या सेक्टर 22 मध्ये आगीची माहिती मिळाली. आगीची माहिती मिळताच आम्ही घटनास्थळी दाखल झालो आणि आग नियंत्रणात आण्यासाठी प्रयत्न सुरु केले. आणि आग नियंत्रित केली गेली.

दरम्यान, यापूर्वी महाकुंभात दोनदा आगीच्या घटना उघडकीस आल्या आहेत. महाकुभ मेळाच्या सेक्टर २ मध्ये दोन गाडयांना आग लागल्याने त्या ठिकाणी खळबळ उडाली होती. या घटनेत कोणतीही जीवितहानी झालेली नव्हती, या घटनेची माहिती मिळताच ताबडतोब अग्निशमन दलाचे कर्मचारी घटनास्थळी दाखल झाले होते आणि आग आटोक्यात आणली होती.

यापूर्वी 19 जानेवारी रोजी महाकुभ मेळाच्या सेक्टर 19 मध्ये आणखी एक आगीची घटना घडली होती, या ठिकाणी एक तंबूत ठेवलेल्या सुकलेल्या गवताला आग लागली होती. या घटनेत सुमारे 18 तंबू जळाले होते. यावेळीही अग्निशमन दलाच्या कर्मचार्‍यांनी तातडीने आगीवर नियंत्रण मिळवले आणि याठिकाणीही कोणतीही जीवित हानी झाली नाही.