साऱ्या देशाचं लक्ष लागून राहिलेली राजधानी दिल्ली विधानसभेची निवडणूक काही दिवसात पार पडणार आहे. येत्या फेब्रूवारी महिन्यात ५ तारखेला मतदान पार पडणार आहे. त्यानंतर लागलीच तीन दिवसांनी म्हणजेच ८ तारखेला मतमोजणी पार पडणार आहे. पैकी एकूण ७० विधानसभेच्या जागांसाठी ही निवडणूक होणार आहे. मात्र दिल्ली विधानसभा निवडणुकीपूर्वी अशा अनेक सर्वेक्षणांनी आणि सट्टेबाजी बाजाराच्या अंदाजांनी नागरिकांना धक्का दिला आहे.
५ फेब्रुवारी रोजी होणाऱ्या मतदानापूर्वी सत्ताधारी आम आदमी पक्षाने दिल्लीतील मतदारांना आकर्षित करण्यासाठी असंख्य लोकप्रिय आश्वासने दिली आहेत. यासोबतच भाजप आणि काँग्रेसने दिल्लीतील जनतेसाठी अनेक योजना सादर करून आश्वासन दिली आहेत.
निवडणूकीच्या आधी घेण्यात आलेल्या ओपिनियन पोल्स आणि सट्टेबाजी बाजाराच्या अंदाजांमुळे या विधानसभा निवडणुकीत आम आदमी पक्षाला फायदा झाला आहे. निवडणुकीच्या आधीच्या दोन आठवड्यात सट्टेबाजी बाजाराने आपल्या किमती बदलल्या आहेत. पण तरीही आपने ७० सदस्यांच्या विधानसभेत ३६ जागांचा बहुमताचा आकडा पार केल्याचा दावा केला जातोय. त्याचवेळी, भारतीय जनता पक्ष आणि काँग्रेस दोघेही आपल्या ताकदीने आपला आव्हान देण्याचा प्रयत्न करत आहेत. दुसरीकडे सट्टेबाजार व्यवसायात भारतीय जनता पक्ष ३१ ते ३३ जागा जिंकू शकतो, असा अंदाज आहे.
अरविंद केजरीवाल आणि सध्याच्या मुख्यमंत्री अतिशी मारलेना यांच्या नेतृत्वाखालचा आम आदमी पक्ष पुन्हा तिसऱ्यांदा सत्तेत येण्याची आशा बाळगत आहे. त्यांना यावेळी बऱ्याच अडचणींचा सामना करावा लागत आहे. पण तरीही आम आदमी पक्षाचे मोफत वीज, पाणी आणि शिक्षण क्षेत्रातील सुधारणा यांसारख्या कल्याणकारी योजना पक्षाची लोकप्रियता टिकवून ठेवण्यात यशस्वी झाल्या आहेत. मात्र या योजना पक्षासाठी कितपत फायदेशीर ठरू शकतात? हे निवडणुकीत उत्तर मिळेल. तर दिल्लीत जवळपास तीन दशकांपासून सत्तेबाहेर असलेल्या भारतीय जनता पक्षाने यावेळी केजरीवाल यांच्याविरुद्ध आक्रमक मोहीम सुरू केली आहे. भाजपने आपवर भ्रष्टाचार आणि कारभाराचे आरोप केले आहेत आणि केजरीवाल सरकारच्या अपयशांवर प्रकाश टाकण्यासाठी निवडणूक प्रचाराचा वापर केला आहे.
त्याचबरोबर दिल्ली निवडणुकीत काँग्रेस पक्षाबद्दल बोलायचं झालं तर, गेल्या काही वर्षांपासून काँग्रेस पक्ष हा दिल्लीत सक्रिय नाही. पण, काँग्रेस आता निवडणुकीच्या रिंगणात उतरली आहे. काँग्रेसकडे गमावण्यासारखे काही नाही पण दिल्लीत सत्ता मिळवण्याच्या त्यांना अनेक आशा आहेत. दिल्लीचे राजकारण केवळ अपेक्षांवर आधारित आहे. त्यामुळे दिल्लीची जनता कुणाला कौल देते हे येत्या ८ फेब्रुवारीलाचं कळेल पण मात्र अजूनतरी आप प्रथम आणि भाजप यांच्यात जोरदार रस्सीखेच आहे हे नक्की.
