Budget Session 2025 : आजपासून संसदेचे अर्थसंकल्पीय अधिवेशन सुरु होत आहे. त्याची सुरुवात राष्ट्रपती द्रौपदी मुर्मू यांच्या अभिभाषणाने होईल. त्यांचे भाषण सकाळी ११ वाजता असेल. यानंतर आर्थिक सर्वेक्षण सादर केले जाईल. उद्या म्हणजेच 1 फेब्रुवारी रोजी अर्थमंत्री निर्मला सीतारमण या देशाचा अर्थसंकल्प सादर करतील.

सरकारने अर्थसंकल्पीय अधिवेशनासाठी १६ विधेयकांची यादी तयार केली आहे.यामध्ये वादग्रस्त वक्फ मंडळ दुरूस्तीसह 16 विधेयकं आणि 19 कामकाजी दस्तावेज सूचीबद्ध आहेत.

अर्थमंत्री निर्मला सीतारमण २०२४-२५ चा आर्थिक आढावा सादर करतील. सत्राचा पहिला टप्पा १३ फेब्रुवारी रोजी संपेल. तसेच दुसरा टप्पा १० मार्च रोजी सुरू होईल आणि ४ एप्रिल रोजी संपेल. अर्थसंकल्पीय अधिवेशनापूर्वी झालेल्या सर्वपक्षीय बैठकीत सरकारने सर्वांना सहकार्याचे आवाहन केले आहे. या बैठकीत ३६ राजकीय पक्षांचे ५२ नेते सहभागी झाले होते.

केंद्रीय संसदीय कामकाज मंत्री किरेन रिजिजू म्हणाले की, हे वर्षातील पहिले अधिवेशन असल्याने राष्ट्रपती दोन्ही सभागृहांच्या संयुक्त अधिवेशनाला संबोधित करतील. यानंतर आर्थिक सर्वेक्षण सादर केले जाईल. केंद्रीय अर्थसंकल्प १ फेब्रुवारी रोजी सादर केला जाईल. यानंतर राष्ट्रपतींचे अभिभाषण आणि अर्थसंकल्पावर चर्चा होईल . दिल्लीत मतदान असल्याने ५ फेब्रुवारी रोजी सुट्टी असेल, त्या दिवशी संसदेचे कामकाज होणार नाही. असेही त्यांनी यावेळी नमूद केले

तर काँग्रेस नेते गौरव गोगोई म्हणाले की, विरोधी पक्षाच्या वतीने आम्ही संसद एकतर्फी पद्धतीने चालवली जात असल्याची चिंता व्यक्त केली आहे. जेपीसीमध्येही, वक्फ विधेयकात विरोधकांनी मांडलेल्या सुधारणा पूर्णपणे फेटाळण्यात आल्या, तर दुसरीकडे सत्ताधारी पक्षाने केलेले बदल स्वीकारण्यात आले होते. आम्ही या विषयावर आमचे विचार देखील व्यक्त केले. महाकुंभमेळ्यादरम्यान झालेल्या अपघाताबद्दल आम्ही दुःख व्यक्त केले आहे