संसदेचे अर्थसंकल्पीय अधिवेशन आजपासून सुरु होत आहे. या पार्श्वभूमीवर पंतप्रधान नरेंद्र मोदी संसदेत दाखल झाले आहेत. यावेळी त्यांनी माध्यमांना संबोधित केले. यावेळी पंतप्रधान मोदी म्हणाले की,आज बजेट सत्राच्या प्रारंभी मी समृद्धीची देवी, लक्ष्मी मातेला नमन करतो. अशा वेळी लक्ष्मी मातेचे स्मरण करणे ही आपली जुनी परंपरा आहे. लक्ष्मी माता ही सिद्धी देते. आई लक्ष्मी गरीब, मध्यम वर्गावर विशेष कृपा ठेवेल,” असे म्हणत पंतप्रधानांनी मध्यमवर्गीयांसाठी अर्थसंकल्पामध्ये असणाऱ्या तरतुदींबाबत एकप्रकारे सूतोवाच केल्याचे बोलले जात आहे. आजपासून संसदेचे अर्थसंकल्पीय अधिवेशनाचा बिगूल वाजणार आहे. पंतप्रधान मोदींच्या तिसऱ्या कार्यकाळातील पहिला पूर्ण अर्थसंकल्प या अधिवेशनादरम्यान मांडला जाणार आहे.
जनतेने मला तिसऱ्यांदा जबाबदारी दिली. मोदी सरकारच्या तिसऱ्या कार्यकाळाचे हे पहिले पूर्ण बजेट आहे. या अधिवेशनात अनेक ऐतिहासिक मुद्द्यांवर चर्चा होईल. तसेच महिला वर्गासाठी अत्यंत आवश्यक निर्णय या अधिवेशनात होणार आहेत. रिफॉर्म, परफॉर्म, ट्रान्सफॉर्म ही त्रिसूत्री या अधिवेशनात बघायला मिळणार आहे, असे पंतप्रधान भाषणादरम्यान म्हणाले आहेत.
पंतप्रधान नरेंद्र मोदी यांनी या बजेटमध्ये विकसीत भारताचा चेहरा दिसेल असा विश्वास व्यक्त केला आहे. तिसऱ्या कार्यकाळात सरकारचे मिशन सर्वांचा विकास हेच असल्याचे नमूद करत ते म्हणाले की, आमचा देश तरुणांचा आहे. आपल्याकडे तरुणांची शक्ती आहे. आज जी 20-25 वर्षांचे तरुण आहेत. ते जेव्हा 45-50 वर्षांचे होतील, तेव्हा ते या विकसीत भारताचे सर्वात मोठे लाभार्थी असतील .
पंतप्रधान नरेंद्र मोदी पुढे म्हणाले की, हे अधिवेशन विशेषतः तरुण खासदारांना त्यांचे विचार व्यक्त करण्याची एक महत्त्वाची संधी प्रदान करेल. तरुण खासदारांकडून सभागृहात जितकी जास्त जागरूकता आणि सहभाग वाढेल तेवढेच विकसित भारतासाठी त्यांचे योगदान महत्वपूर्ण ठरणार आहे. म्हणूनच, तरुण खासदारांसाठी ही एक मौल्यवान संधी असणार आहे.
