राज्य सरकारच्या मराठी भाषा विभागातर्फे पुण्यात ३१ जानेवारी ते २ फेब्रुवारी या कालावधीत तिसरे विश्व मराठी संमेलन होत आहे.पुण्यामधील फर्ग्युसन महाविद्यालयाच्या मैदानावर या संमेलनाचे उद्घाटन आज मुख्यमंत्री देवेंद्र फडणवीस यांनी केले आहे. यावेळी त्यांच्यासह उपमुख्यमंत्री अजित पवार, एकनाथ शिंदे यांच्यासह सांस्कृतिक मंत्री उदय सामंत या सोहळ्याला उपस्थित होते.ज्येष्ठ साहित्यिक मधु मंगेश कर्णिक यांना त्यांच्या मराठी साहित्यातील अमूल्य योगदानासाठी ‘साहित्य भूषण पुरस्कार’ प्रदान करून गौरविण्यात आले.

“आज तिसऱ्या विश्व मराठी संमलेनामध्ये आपल्य सर्वांचे मनपूर्वक स्वागत करताना मला आनंद होत आहे असे म्हणत मुख्यमंत्री देवेंद्र फडणवीस यांनी भाषणाला सुरवात केली. “माय मराठीवर प्रेम करणारे आणि परदेशातून जे लोक इथे आलेत, त्यांचं विशेष स्वागत आणि अभिनंदन या निमित्ताने मी करतो. पुणे विद्येच माहेरघर आहे. आपली सांस्कृतिक राजधानी आहे. माझ्या सारख्या नागपुरी माणसाला तर पुण्याची मराठी म्हणजे प्रमाण मराठी आहे त्यामुळे प्रमाण मराठीच्या माहेरघरी विश्व मराठी संमेलन होत आहे ही आपल्या सर्वांसाठी आनंदाची गोष्ट आहे” असं मुख्यमंत्री देवेंद्र फडणवीस म्हणाले आहेत.

“मराठी भाषेला अभिजात दर्जा मिळाल्यानंतरच हे पहिले संमलेन आहे, याच आपल्या सर्वांना आनंद आहे. त्या निमित्ताने मी देशाचे प्रधानमंत्री नरेंद्र मोदी यांचे मनापासून आभार मानतो” असेही फडणवीसांनी नमूद केले.

साहित्य संमेलन असो, नाट्य संमेलन असो अथवा विश्व मराठी संमेलन असो. वाद निर्माण झाला नाही तर ते मराठी संमेलन होऊच शकत नाही. वाद निर्माण करणे हा आपला स्थायी भाव आहे. कारण आपण संवेदनशील लोक आहोत त्यामुळे वाद, विवाद झालेच पाहीजे कारण त्यातूनच मंथन होऊ शकते असे प्रतिपादन मुख्यमंत्री फडणवीसांनी केले.

यावेळी त्यांच्या दावोस दौऱ्याचा किस्सा त्यांनी उपस्थितांना सांगितला. ते म्हणाले की, नुकतेच दावोसला गेलो असताना तिथे काही मराठी मंडळींनी माझे स्वागत केले. एका लहान मुलाने “लाभले आम्हास बोलतो मराठी…”, हे गाणं सुंदर पद्धतीने सादर केले. यावेळी त्याने मला माझ्या ‘मी पुन्हा येईन’ वाक्याची आठवण करून दिली.

मी पुन्हा येईन हे वाक्य माझा पिच्छाच सोडत नाही, मात्र लोक आधी उपहासाने म्हणायचे मात्र आता कौतुकाने म्हणतात. एखादा शब्द आपल्याला चिकटतो तेव्हा त्याचे काळवेळा नुसार अर्थ बदलत असतात. मात्र मी तुम्हाला सांगतो की हे तुम्ही ठरवले पाहीजे की जेव्हा जेव्हा विश्व संमेलन होईल तेव्हा मी पुन्हा येईन, मी पुन्हा येईन, मी पुन्हा येईन,’ असे म्हणत फडणवीसांनी उपस्थितांमध्ये हशा पिकवला.

या संमेलनात बोलत असताना मुख्यमंत्री देवेंद्र फडणवीस यांनी मराठी भाषेला कृत्रिम बुद्धिमत्तेची (AI) जोड देण्या संकल्पना साहित्य उपलब्ध करून देण्यासाठी पूर्वी संकेतस्थळ तयार केले जायचे. मात्र आता संकेतस्थळाचे युग मागे पडले असून कृत्रिम बुद्धिमत्तेचे युग सुरू झाले आहे. या अभिनव संकल्पनेची सुरुवात राज्य सरकारच्या मराठी भाषा विभागाने करावी, अशी भूमिका फडणवीसांनी यावेळी मांडली.