अमृतसरमधील मंदिराबाहेर झालेल्या स्फोटाच्या घटनेतील संशयित सोमवारी पंजाब पोलिसांशी झालेल्या चकमकीत ठार झाला आहे. तर आणखी एक संशयित फरार झाला असून, त्याला पकडण्यासाठी पोलीस प्रयत्न करत आहेत.

15 मार्च रोजी अमृतसरमधील ठाकूरद्वार मंदिराबाहेर रात्री उशिरा ग्रेनेड हल्ला करण्यात आला होता. दोन तरुणांनी मंदिरात ग्रेनेड फेकले होते. ही सर्व घटना सीसीटीव्हीत कैद झाली होती. त्यानंतर पोलीस या घटनेतील संशयितांचा शोध घेत होते.

शुक्रवारी रात्री हे दोघेही काही वेळ मंदिराबाहेर उभे होते नंतर ते ग्रेनेड फेकून तिथून पळून जाताना सीसीटीव्हीत कैद झाले होते. शुक्रवारी रात्री 12.35 च्या सुमारास हा हल्ला झाला. यामुळे परिसरात भीतीचे वातावरण निर्माण झाले होते.

मंदिरावर हा हल्ला झाला तेव्हा मंदिरातील पुजारी मंदिरातच झोपलं होते. पण सुदैवाने ते या हल्ल्यातून थोडक्यात बचावले. पोलिसांनी सीसीटीव्हीच्या आधारे या प्रकरणाचा तपास सुरू केला होता.

Acting on specific intelligence, Commissionerate Police Amritsar decisively tracked down those responsible for the attack on Thakur Dwara Mandir, #Amritsar, on March 15, 2025. An FIR has been registered at PS Chheharta under the Explosive Substances Act, and intelligence-based…

— DGP Punjab Police (@DGPPunjabPolice) March 17, 2025

पंजाबचे डीजीपी गौरव यादव म्हणाले की, ‘अमृतसर पोलिसांनी मंदिरावरील हल्ल्यासाठी जबाबदार असलेल्यांचा शोध घेतला आहे. डीजीपी यादव यांनी ट्विट करत यासंबंधित माहिती दिली असून आपल्या पोस्टमध्ये ते म्हणाले की, ‘पोलिसांच्या पथकाने मंदिराबाहेर हल्ल्या झाल्यानंतर संशयितांचा शोध घेतला. यावेळी पोलिसांमध्ये आणि आरोपींमध्ये चकमक झाली. या चकमकीत कॉन्स्टेबल गुरप्रीत सिंग जखमी झाले. स्वतःला वाचवण्यासाठी प्रत्युत्तर देत असताना एक आरोपी जखमी झाला. त्याला सरकारी रुग्णालयात नेण्यात आले, तेथे त्याचा मृत्यू झाला. तर दुसरा आरोपी पळून गेला असून त्याला पकडण्याचे प्रयत्न सुरू आहेत.” अशी माहिती देण्यात आली आहे.