राज्याचे सांस्कृतिक कार्यमंत्री ॲड. आशिष शेलार यांनी केंद्रीय मंत्री गजेंद्रसिंह शेखावत यांना पत्र पाठवून छत्रपती शिवाजी महाराज यांचे किल्ले भारतीय पुरातत्व विभागाच्या अखत्यारितून राज्याच्या पुरातत्व विभागाकडे हस्तांतरित करण्याची विनंती केली आहे. छत्रपती श‍िवाजी महाराज आण‍ि मराठा साम्राज्याच्या बलाढय इतिहासाची साक्ष देणारे महाराष्ट्रात 54 गड किल्ले हे केंद्र संरक्षित असून 62 गड किल्ले राज्य संरक्षित किल्ले आहेत. राज्य शासन किल्ल्यांच्या संरक्षणासाठी विविध प्रकारे प्रयत्न करत आहे. जर हे किल्ले राज्याच्या अखत्यारित देण्यात आले, तर त्यांची देखभाल अधिक प्रभावीपणे केली जाऊ शकते, असे शेलार यांनी आपल्या पत्रात नमूद केले आहे.

युनेस्कोच्या जागतिक वारसा स्थळांच्या यादीत महाराष्ट्रातील 12 ऐतिहासिक किल्ल्यांचा समावेश करण्यासाठी शेलार यांनी पॅरिस येथे शासकीय प्रयत्न सुरू केले आहेत. यामध्ये रायगड, राजगड, प्रतापगड, पन्हाळा, शिवनेरी, लोहगड, साल्हेर, सिंधुदुर्ग, सुवर्णदुर्ग, विजयदुर्ग, खांदेरी किल्ला आणि जिंजी किल्ला यांचा समावेश आहे.

महाराष्ट्र शासनाच्या पुरातत्व आणि वस्तुसंग्रहालय संचालनालयाने किल्ल्यांच्या संरक्षणाच्या कामात विशेष तज्ञ, कंत्राटदार आणि वास्तुविशारदांचा वापर करून हे कार्य अधिक प्रभावीपणे हाती घेतले आहे. तसेच, पर्यटनाला चालना देण्यासाठी विविध उपाययोजना केल्या जात आहेत. काही खाजगी संस्था सीएसआरच्या माध्यमातून निधी देण्यास तयार आहेत, ज्यामुळे किल्ल्यांचे संरक्षण आणखी चांगल्या पद्धतीने होऊ शकते. त्यामुळे आमच्या इतिहासाची साक्ष् देणारे हे किल्ले जतन करणे आमचे कर्तव्य असून आमच्यासाठी हे अभ‍िमानाचे कार्य ठरू शकते त्यामुळे हे किल्ले भारतीय पुरातत्व विभागाकडून महाराष्ट्र किल्ले हस्तांतरित करण्याची प्रक्रिया सुरू करण्याचे निर्देश आपण द्यावेत, अशी विनंती ॲड. शेलार यांनी केली आहे.