नुकताच प्रयागराज येथील कुंभमेळा पार पडला. त्यानंतर आता २०२७ मध्ये नाशिकमध्ये होणाऱ्या सिंहस्थ कुंभमेळ्याच्या तयारीसाठी, महायुती सरकारने त्र्यंबकेश्वर तीर्थस्थळाला ‘अ’ दर्जा देऊन इथल्या विकासाच्या दृष्टीने प्रयत्न सुरू केले आहेत. या निर्णयाचा उद्देश मंदिराच्या पायाभूत सुविधा वाढवणे आणि भाविकांसाठी सुविधा उपलब्ध करून देणे आहे.
मागच्या आठवड्यात मुख्यमंत्री देवेंद्र फडणवीस यांनी त्र्यंबकेश्वरला भेट देऊन महादेवाचे दर्शन घेतले होते. यावेळी त्यांनी तीर्थक्षेत्राची पाहणी करून प्रशासनाला महत्त्वाच्या सूचना केल्या होत्या. त्यानंतर आता सरकारने त्र्यंबकेश्वर मंदिराला ‘अ’ दर्जा देण्याचा निर्णय घेतला आहे. जानेवारी महिन्यात विभागीय आयुक्तांनी याबाबतचा प्रस्ताव शासनाला पाठवला होता. त्यास नगरविकास विभागाने मंजुरी दिली आहे.
या निर्णयामुळे केंद्र आणि राज्य सरकारांमधील सहकार्याद्वारे विकास उपक्रमांना गती मिळेल, ज्यामुळे यात्रेकरूंसाठी चांगले रस्ते, स्वच्छता आणि पाणीपुरवठा यासारख्या वाढीव सुविधा उपलब्ध होतील.तसेच शासनाचा हा निर्णय नाशिकच्या धार्मिक आणि सांस्कृतिक महत्त्वाला आणखी उजाळा देणारा ठरेल.
दरम्यान त्र्यंबकेश्वर देवस्थानचे विश्वस्त स्वप्नील शेलार यांनी या निर्णयाचे स्वागत केले आहे. त्र्यंबकेश्वर देवस्थान तीर्थक्षेत्राला ‘अ’ वर्ग दर्जा मिळाल्यामुुळे केंद्र सरकार आणि राज्य सरकारला संयुक्तरित्या काम करता येणार असून विकासकामे वेगाने होतील. भाविकांना प्राधान्य देत आणखी सुविधा वाढविता येतील. लवकरच अन्नछत्रदेखील सुरू करण्यात येणार असून ‘अ’ दर्जा मिळाल्यामुळे त्यात आणखी सुधारणा करणे शक्य होईल. आगामी सिंहस्थ कुंभमेळ्याच्या दृष्टीने हा अतिशय स्वागतार्ह निर्णय असल्याची भावना शेलार यांनी व्यक्त केली आहे.
अलिकडेच फडणवीस यांनी १२ पूजनीय ज्योतिर्लिंगांपैकी एक असलेल्या त्र्यंबकेश्वर मंदिराला भेट देत महादेवाची महापूजा केली होती. तसेच त्यानंतर कुशावर्त परिसराची पाहणी केली आणि तिथं उपस्थित साधू-महंतांशी संवाद साधला. या भेटीनंतर, फडणवीस यांनी घोषणा केली की कुंभमेळ्याच्या पार्श्वभूमीवर त्र्यंबकेश्वरसाठी विशेषतः ₹१,१०० कोटी रुपयांचा व्यापक विकास आराखडा तयार केला जात आहे, “उत्तर प्रदेशप्रमाणेच कुंभमेळ्यासाठी कायदा तयार करण्यात येणार आहे,” त्यानंतर आता आठवडाभरातच त्र्यंबकेश्वर देवस्थान तीर्थक्षेत्राला ‘अ’ वर्ग दर्जा प्राप्त झाल्याने देवस्थान आणि स्थानिकांकडून सरकारचे कौतुक केले जात आहे.
