Anna Bansode: अजित पवारांचे कट्टर समर्थ म्हणून ओळखल्या जाणाऱ्या अण्णा बनसोडेंची २६ मार्च रोजी विधानसभेचे उपाध्यक्ष म्हणून बिनविरोध निवड करण्यात आली आहे. परंतु आता त्यांची आमदारकी मात्र धोक्यात आली आहे. कारण अण्णा बनसोडे यांच्या आमदारकीला मुंबई उच्च न्यायालयात आव्हान देण्यात आले आहे.

अण्णा बनसोडे पिंपरी विधानसभा मतदारसंघाचे विद्यमान आमदार आहेत. आता महाविकास आघाडीच्या उमेदवार सुलक्षणा शीलवंत-धर यांनी अण्णा बनसोडेंच्या आमदारकीला मुंबई उच्च न्यायालयात आव्हान देत याचिका दाखल केली आहे. बनसोडे यांनी विधानसभा निवडणुकीत निवडणूक नियमांचे उल्लंघन केल्याचा आरोप सुलक्षणा शीलवंत-धर यांनी याचिकेतून केला आहे. न्यायमूर्ती गौरी गोडसे यांच्या एकलपीठापुढे याचिकेवर सुनावणी झाली आहे. आता मुंबई उच्च न्यायालयाने 2 एप्रिल रोजी अण्णा बनसोडेंना न्यायालयात हजर राहण्याचे आदेश दिले आहेत.

दरम्यान, महायुतीच्या सरकारमध्ये मंत्रिपद मिळेल असा त्यांना विश्वास होता. परंतु मंत्रीपद न मिळाल्याने ते निराश झाले होते. नागपूरमध्ये जेव्हा हिवाळी अधिवेशन सुरू होते तेव्हा ते अधिवेशन सोडून मतदारसंघात निघून आले होते. आता विधानसभेचे उपाध्यक्षपद देऊन अजित पवार यांनी बनसोडे यांची नाराजी दूर करण्याचा प्रयत्न केला आहे. कारण उपाध्यक्ष पद हे मंत्री दर्जाचे पद असल्याने अप्रत्यक्षपणे मंत्री दर्जाचे पद अण्णा बनसोडेंना देण्यात आले आहे.

अण्णा बनसोडे २००९ मध्ये पहिल्यांदा आमदार म्हणून निवडून आले. परंतु २०१४ च्या निवडणुकीत त्यांना पराभवाला सामोरे जावे लागले. मात्र २०१९ मध्ये पुन्हा ते विजयी झाले आणि २०२४ च्या विधानसभा निवडणुकीतही त्यांचा दणदणीत विजय झाला. अशा प्रकारे त्यांची आमदारकीची ही तिसरी टर्म आहे. विशेष म्हणजे राजकारणात येण्यापूर्वी बनसोडे चिंचवड येथे पान टपरी चालवत होते. आता त्यांच्या रूपाने पिंपरी चिंचवडला पहिल्यांदाच विधानसभा उपाध्यक्ष पद मिळाले आहे.