Disha Salian Case: दिवंगत अभिनेता सुशांतसिंह राजपूतची खाजगी सचिव दिशा सालियानच्या मृत्यू प्रकरणाबाबत दिशाचे वडिल सतिश सालियन यांनी याचिका दाखल केली आहे. या याचिकेत त्यांनी आदित्य ठाकरेंवरती गंभीर आरोप केल्याने हे प्रकरण पुन्हा चर्चेत आले. मात्र आता सतिश सालियन यांनी दिलेल्या जबाबामुळे विविध चर्चांणा उधाण आले आहे.

सतीश सालियान यांनी दिशाच्या मृत्यूपूर्वी त्यांच्यात झालेल्या वादाची कबुली दिली आहे. सतिश सालियान यांनी सांगितले आहे की, लॉकडाऊन काळात त्यांच्या दिवंगत मित्राच्या पत्नीला आर्थिक मदतीची गरज होती. त्यामुळे त्यांनी किराणा खर्चासाठी त्या महिलेला मदत केली. हे पैसे ते आपल्या खात्यातून थेट देत नव्हते, तर एका मित्राच्या माध्यमातून रोख स्वरूपात देत होते. मात्र या प्रकरणामुळे दिशा आणि सतीश यांच्यात वाद निर्माण झाला होता.

दिशाला वाटत होते की, वडील त्या महिलेला नेहमीच पैसे देत आहेत, कारण सतीश यांचे व्हॉट्सअप मेसेज तिच्या लॅपटॉपवर दिसत होते. त्यातून गैरसमज निर्माण झाला होता. त्यामुळे सतीश यांनी स्वतःच्या खात्यातून पैसे देणे थांबवले होते. मात्र त्या काळात झालेल्या गैरसमजांमुळे त्यांच्या नात्यात तणाव निर्माण झाला होता, अशी माहितीही त्यांनी दिली.

दिशाचा मृत्यू होण्याच्या सहा दिवसांआधी सतीश सालियान यांनी पुन्हा एकदा आपल्या मित्राच्या माध्यमातून त्या महिलेला तीन हजार रुपये पाठवले होते. त्यांनी रोख रक्कम मित्राकडे दिली आणि ती रक्कम संबंधित महिलेला पाठवण्यास सांगितले. मित्राने पैसे पाठवल्यानंतर त्याचा स्क्रीनशॉट सतीश यांना पाठवला होता. मात्र दिशा तिच्या लॅपटॉपवर हे मेसेज वाचत होती, आणि त्यामुळे वडिलांनी अजूनही महिलेला पैसे देत असल्याचा तिला संशय आला. यानंतर दिशा आणि त्यांच्यात वाद झाला होता अशी कबुली तिच्या वडिलांनी दिली आहे. त्यामुळे आता विविध चर्चांणा उधाण आले आहे.