पंतप्रधान नरेंद्र मोदी सध्या श्रीलंका दौऱ्यावर आहेत. श्रीलंका दौऱ्यादरम्यान पंतप्रधानांना ‘श्रीलंका मित्र विभूषण पुरस्कार’ देऊन सन्मानित करण्यात आले आहे. श्रीलंकेशी चांगले संबंध असलेल्या देशांच्या राष्ट्रप्रमुखांना श्रीलंका सरकार हा सन्मान देते. बऱ्याच काळापासून भारताचे श्रीलंकेशी ऐतिहासिकदृष्ट्या चांगले संबंध राहिले आहेत. आता या चांगल्या संबंधांना ओळखून श्रीलंका सरकारने पंतप्रधान मोदींना हा सन्मान दिला आहे.

पंतप्रधान मोदींना या सन्मानाने गौरवण्यात आल्यानंतर श्रीलंकेचे राष्ट्रपती अनुरा कुमारा दिसानायके यांनी भारताला एक मोठे आश्वासन दिले आहे. ‘भारताच्या सुरक्षेच्या हितासाठी श्रीलंका कोणालाही चुकीची पाऊलं उचलण्यासाठी आपल्या भूमीचा वापर करू देणार नाही.’ असं त्यांनी स्पष्ट शब्दात सांगितलं आहे. यावेळी दिसानायके यांनी चीनचे नाव न घेता चीनला हा संदेश दिला आहे.

#WATCH | Colombo | Prime Minister Narendra Modi says, "…Today, to be honoured with the Sri Lanka Mitra Vibhushan award by President Anura Kumara Dissanayake—it's not an honour to me but to 140 crore Indians. It shows the historical relation and deep friendship between the… https://t.co/YQzcwp16n0 pic.twitter.com/wCzYZUin8b

— ANI (@ANI) April 5, 2025

श्रीलंकेने दिलेले हे आश्वासन भारतासाठी खूप महत्वाचे आहे. कारण, चीनकडून सातत्याने हिंदी महासागरात घुसखोरी करण्याचा प्रयत्न केला जात आहे. चीनने श्रीलंकेचे हंबनटोट बंदर यापूर्वीच ९९ वर्षांसाठी भाड्याने घेतले आहे. ज्यामुळे भारताची चिंता वाढली होती. आता श्रीलंकेच्या राष्ट्राध्यक्षांनी दिलेल्या या आश्वासनानंतर भारताची चिंता दूर झाली आहे.

दरम्यान, भारत आणि श्रीलंकेची वाढती मैत्री पाहता चीनची अस्वस्थता वाढण्याची शक्यता आहे. कारण दिसानायके यांच्या वक्तव्यानंतर चीनला स्वतःच्या मनसुब्यांवरती कुठेतरी पाणी फिरताना दिसत आहे.

या दौऱ्यादरम्यान, पीएम मोदी आणि श्रीलंकेचे राष्ट्रपती दिसानायके यांनी सामापूर सौर ऊर्जा प्रकल्पाचे उद्घाटन केले आहे. याशिवाय भारत आणि श्रीलंका यांनी संरक्षण सहकार्य करारावरही स्वाक्षऱ्या केल्या आहेत. हा करार भारतासाठी सामरिकदृष्ट्या महत्त्वाचा मानला जातो.