Devendra Fadnvis: मुख्यमंत्री देवेंद्र फडणवीस यांच्या पहिल्या मुख्यमंत्री पदाच्या कारकीर्दीत ‘मुख्यमंत्री फेलोशिप कार्यक्रम’ सुरू करण्यात आला होता व यशस्वीपणे राबविण्यातही आला होता. नुकताच यंदाचा म्हणजेच ‘मुख्यमंत्री फेलोशिप कार्यक्रम 2025-26’  जाहीर करण्यात आला आहे.

या कार्यक्रमांतर्गत ६० फेलोंची निवड करण्यात येणार आहे. त्यानुसार निवड झालेल्या उमेदवारांना महिन्याला ६१ हजार ५०० रुपयांचे मानधन दिले जाणार आहे. या कार्यक्रमाची अंमलबजावणी नियोजन विभागाच्या अर्थ व सांख्यिकी संचालनालयामार्फत केली जाणार आहे.

फेलोंच्या निवडीसंदर्भातील निकष, नियुक्तीसंदर्भातील अटी व शर्ती तसेच शैक्षणिक संस्थांमार्फत राबविण्यात येणाऱ्या शैक्षणिक कार्यक्रमाची रूपरेषा व अंमलबजावणीबाबत शासन निर्णय महाराष्ट्र शासनाच्या संकेतस्थळावर उपलब्ध करून देण्यात आला आहे.

फेलोंच्या निवडीसाठी पात्रता काय असणार आहे?

-अर्जदार भारताचा नागरिक असावा. तो कोणत्याही शाखेतील पदवीधर असावा आणि त्याला किमान ६०% गुण असावेत.

– त्याला किमान १ वर्षाचा पूर्णवेळ कामाचा अनुभव असावा.

-तसेच, व्यावसायिक अभ्यासक्रमाच्या विद्यार्थ्यांसाठी त्यांच्या अभ्यासक्रमाचा भाग म्हणून पूर्णवेळ इंटर्नशिप / अप्रेंटीसशिप /आर्टीकलशिपसह १ वर्षाचा अनुभव आवश्यक असणार आहे.

-पूर्णवेळ स्वयंरोजगार, स्वयंउद्योजकतेचा अनुभवही ग्राह्य धरण्यात येईल. अर्जदारास यासंदर्भातील स्वयंघोषणापत्र तसे सादर करावे लागेल.

-उमेदवाराला मराठी भाषा लिहिता, वाचता व बोलता येणे आवश्यक राहील. तसेच हिंदी व इंग्रजी भाषेचे पुरेसे ज्ञान असणे असावे.

-तसेच, संगणक हाताळणी आणि इंटरनेटचे ज्ञान आवश्यक राहील. उमेदवाराचे वय अर्ज सादर करावयाच्या अंतिम दिनांकास किमान २१ वर्षे व कमाल २६ वर्षे असावे.

दरम्यान, राज्यातील युवकांना प्रशासनासोबत काम करण्याचा अनुभव मिळावा. तसेच तरूणांच्या ज्ञानाच्या, अनुभवाच्या कक्षा रुंदावण्यास मदत व्हावी. तरुणांमधील कल्पकता व वेगळा विचार मांडण्याची क्षमता, उत्साह, तंत्रज्ञानाची आवड यांचा उपयोग प्रशासनाला व्हावा आणि या माध्यमातून प्रशासकीय प्रक्रियांमध्ये गतिमानता यावी. यासाठी मुख्यमंत्री देवेंद्र फडणवीस यांच्या संकल्पनेतील ‘मुख्यमंत्री फेलोशिप कार्यक्रम दरवर्षी राबवण्यात येतो.

.