Kajol Devgan: राज्य शासनाच्या सांस्कृतिक कार्य विभागातर्फे दिल्या जाणाऱ्या मानाच्या चित्रपट पुरस्कारांची घोषणा 17 एप्रिल रोजी करण्यात आली आहे. सांस्कृतिक कार्य मंत्री ॲड.आशिष शेलार यांनी पत्रकार परिषद घेत या पुरस्कारांची घोषणा केली आहे. यावेळी आशिष शेलार यांनी महत्वाच्या पाच पुरस्कारांची नावे जाहीर केली आहे. यामध्ये चित्रपती व्ही.शांताराम जीवन गौरव पुरस्कार, चित्रपती व्ही.शांताराम विशेष योगदान पुरस्कार, स्व.राज कपूर जीवन गौरव पुरस्कार, स्व.राज कपूर विशेष योगदान पुरस्कार तसेच गानसम्राज्ञी लता मंगेशकर पुरस्कार अशा पाच महत्त्वाच्या पुरस्कारांचा समावेश आहे.

या वर्षीचा चित्रपती व्ही.शांताराम जीवन गौरव पुरस्कार नामवंत अभिनेते, दिग्दर्शक व निर्माते महेश मांजरेकर यांना दिला जाणार आहे. या पुरस्काराचे स्वरूप १० लाख रोख रक्कम, स्मृतीचिन्ह, मानपत्र व चांदीचे पदक आहे. तर चित्रपती व्ही.शांताराम विशेष योगदान पुरस्कार यंदा प्रसिद्ध अभिनेत्री मुक्ता बर्वे यांना जाहीर झाला आहे. या पुरस्काराचे स्वरूप ६ लाख, स्मृतीचिन्ह, मानपत्र व चांदीचे पदक असे असते.

महाराष्ट्र शासनाच्यावतीने
कलाकारांचा सन्मान !

– महाराष्ट्र शासन, सांस्कृतिक कार्य विभागाच्यावतीने मराठी आणि हिंदी चित्रपटसृष्टीतील सर्वोच्च पुरस्कार जाहीर!

•चित्रपती कै. व्ही. शांताराम जीवन गौरव पुरस्कार २०२४ ज्येष्ठ कलाकार श्री. महेश मांजरेकर यांना तर चित्रपती कै.व्ही… pic.twitter.com/eOvBXU6oR0

— Adv. Ashish Shelar – ॲड. आशिष शेलार (@ShelarAshish) April 17, 2025

अभिनेते अनुपम खेर यांना हिंदी चित्रपट सृष्टीतील मानाच्या स्व.राज कपूर पुरस्काराने गौरविण्यात येणार आहे. तर स्व.राज कपूर विशेष योगदान पुरस्कार यंदा अभिनेत्री काजोल देवगण यांना मिळणार आहे. तसेच, 1993 पासून देण्यात येणारा गानसम्राज्ञी लता मंगेशकर पुरस्कार यावर्षी मराठीतील ज्येष्ठ गझल गायक भीमराव पांचाळे यांना प्रदान करण्यात येणार आहे. हा पुरस्काराचे स्वरूप दहा लाख रोख रक्कम, मानचिन्ह, मानपत्र व शाल आहे. या पुरस्कार पुरस्कारांचे वितरण २५ एप्रिल २०२५ रोजी एन.एस.सी.आय. डोम, मुंबई येथे एका भव्य समारंभात होणार आहे.