अयोध्येमध्ये २२ जानेवारीला भव्य मंदिरात प्रभू श्रीराम विराजमान होणार आहेत. पंतप्रधान नरेंद्र मोदी हे मंदिराचे लोकार्पण करणार आहेत. यानिमित अनेक मान्यवरांना या सोहळ्यासाठी निमंत्रित करण्यात आले आहे. सध्या अयोध्येतील रामलल्लाच्या प्राणप्रतिष्ठेच्या अनुष्ठानाला सुरुवात झाली आहे. विवध कार्यक्रम या दिवसांमध्ये साजरे केले जाणार आहेत. कलश यात्रा देखील अयोध्येत पोहोचली आहे. रामलल्लाची मूर्ती गर्भगृहात बसवण्यात येणार आहे. यासाठी शरयू नदीच्या पाण्याने गर्भगृह स्वच्छ करण्यात आले आहे. नव्याने बांधण्यात आलेल्या मंदिरात रामलल्ला प्रवेश करणार आहेत. अयोध्येतील रामलल्ला यांची मूर्ती कर्नाटकमधील शिल्पकार अरुण योगिराज यांनी साकारली आहे.
दरम्यान, प्राणप्रतिष्ठा होण्यापूर्वी पंतप्रधान मोदी यांनी लता मंगेशकर यांच्या आठवणीमध्ये एक पोस्ट शेअर केली आहे. ज्यात पंतप्रधान नरेंद्र मोदी म्हणतात, ”ज्या प्रमाणे संपूर्ण देश २२ जानेवारीची वाट पाहत आहे. अशा परिस्थितीमध्ये आपल्याला जय व्यक्तीची उणीव भासत आहे ती म्हणजे आपल्या लाडक्या लता दीदी. त्यांनी गायलेला शेवटचा श्लोक मी शेअर करत आहे. हा लता दीदी यांनी गायलेला शेवटचा श्लोक असल्याचे त्यांच्या कुटुंबीयांनी सांगितले.”
दरम्यान, राम मंदिराच्या सोहळ्यासाठी अनेक मान्यवरांना आमंत्रित करण्यात आले आहे. या सोहळ्याला राजकीय, खेळ, अभिनय, सांस्कृतिक क्षेत्रातील व्यक्तींना निमंत्रण देण्यात आले आहे. यामध्ये रजनीकांत, अनुष्का शर्मा, सचिन तेंडुलकर, अमिताभ बच्चन यांच्यासह अनेक मान्यवर उपस्थित राहणार आहेत.
