मराठा आंदोलक मनोज जरांगे पाटील यांची सगेसोयरेबाबतची मागणी मुख्यमंत्री एकनाथ शिंदे यांनी मान्य केली आहे. त्यामुळे मराठा समाजाला मोठा दिलासा मिळाला आहे. पण राज्य सरकारने घेतलेल्या या निर्णयाला मंत्री छगन भुजबळ यांनी विरोध केला आहे. तसेच छगन भुजबळ यांनी कायदा कोर्टात टिकणार नाही यासाठी कायदेशीर बाजूंचा अभ्यास करायला सुरूवात केली आहे. तसेच त्यांनी ओबीसी नेत्यांची बैठक देखील बोलावली होती. भुजबळांच्या या भूमिकेमुळे राज्य सरकारवर प्रश्नचिन्ह उपस्थित केले जात आहे. अशातच आता भुजबळांच्या या भूमिकेमुळे सरकारमध्ये काहीही आलबेल नसल्याचे दिसत आहे. कारण आता भुजबळांची मंत्रिमंडळातून हकालपट्टी करा, अशी मागणी शिंदे गटातील दोन आमदारांनी केली आहे.
छगन भुजबळ यांची मंत्रिमंडळातून हकालपट्टी करा, अशी मागणी शिंदे गटाचे आमदार संजय गायकवाड यांनी केली आहे. तर भुजबळ यांनी राजीनामा द्यावा, असा सल्ला आमदार संजय शिरसाट यांनी दिला आहे.
संजय गायकवाड म्हणाले की, छगन भुजबळ जो तिरस्कार करतात तो योग्य नाही. त्यामुळे मुख्यमंत्री एकनाथ शिंदे साहेब भूजबळ यांची मंत्रिमंडळातून हकालपट्टी करा. त्यांचे लाड कशाला करता? त्यांना आधी बाहेर काढा. भुजबळांनी मंत्रीपदाची शपथ घेताना सरकारच्या विरोधात काम करणार नाही अशी शपथ घेतली आहे. त्यामुळे सरकार आणि राष्ट्रवादीचे नेते त्यांच्या आत्ताच्या भूमिकेशी सहमत नाही. मुख्यमंत्र्यांनी छत्रपतींची शपथ घेतली आहे. त्यामुळे ज्या मराठ्यांनी हा देश वाचवला त्यांच्या विरोधात भूमिका घेणे योग्य नाही.
एका मंत्र्यांच्या विरोधाने सरकारला काहीही फरक पडत नाही. त्यामुळे मी खुलेआम सांगत आहे की, भुजबळांच्या राजीनाम्याने सरकारला आणि राष्ट्रवादीला कोणताही फरक पडणार नाही, अशी टीकाही संजय गायकवाड यांनी केली.
पुढे संजय शिरसाट यांनी भुजबळांवर टीका करताना म्हटले की, काही लोकांना राजकारण करायचे असेल तर त्यांनी सरकारमधून बाहेर पडावे. तसेच सरकारमधील मंत्र्यांना सरकार चुकले आहे हे सांगायचे असेल तर ते मंत्रिमंडळ बैठकीत बोलले पाहिजे. पण हे जर बाहेर येऊन बोलायचे असेल तर मंत्रिमंडळातून बाहेर पडले पाहिजे. तसेच राजकारण करताना कोणत्याही समाजाला वेठीस धरू नका, असेही शिरसाट म्हणाले.
