झारखंडचे मुख्यमंत्री हेमंत सोरेन यांना जमीन घोटाळ्या प्रकरणातील मनी लॉन्ड्रींग प्रकरणात ईडीने अटक केली आहे. हेमंत सोरेन यांनी २९ डिसेंबर २०१९ रोजी मुख्यमंत्रीपदाचा पदभार स्वीकारला होता. ईडीने मनी लॉन्ड्रींग प्रकरणात सोरेन यांना ९ वेळा समन्स धाडले होते. त्यानंतर बुधवारी म्हणजे काल ईडीने त्यांची तब्बल सहा तासांपेक्षा जास्त वेळ चौकशी केली. दरम्यान हेमंत सोरेन यांनी आपल्या मुख्यमंत्रीपदाचा राजीनामा दिल्यानंतर ईडीने त्यांना अटक केली आहे. त्यामुळे झारखंडच्या राजकारणात मोठी उलथापालथ बघायला मिळत आहे. आता झारखंडचा राज्यकारभार चंपई सोरेन यांच्याकडे सोपविण्यात आला आहे.
झारखंडमधील जमीन घोटाळ्यातील जमीन लॉन्ड्रींग प्रकरणात सोरेन यांची ईडीने चौकशी केली. त्यानंतर हेमंत सोरेन यांनी राजभवनामध्ये राज्यपालांकडे आपला राजीनामा सुपूर्त केला. ईडी सोमवारी कथित जमीन घोटाळ्याप्रकरणी हेमंत सोरेन यांच्या निवासस्थानी चौकशीसाठी पोहोचली होती. ईडीने त्यांच्या निवास्थानातून एक आलिशान गाडी आणि काही महत्वाची कागदपत्रे जप्त केली आहेत. मुख्यमंत्री हेमंत सोरेन यां आतापर्यंत ईडीने तब्बल १० वेळा समन्स जारी केले होते. अखेर आज त्यांची चौकशी केली जाणार आहे. ईडीने या प्रकरणामध्ये पहिल्यांदा २० जानेवारी रोजी मुख्यमंत्री हेमंत सोरेन यांचा जबाब नोंदवला होता. त्यांच्या शासकीय निवासस्थानी ईडीच्या अधिकाऱ्यांनी सुमारे सात तास त्यांचा जबाब नोंदवला. हा जबाब मनी लॉन्ड्रींग प्रतिबंधक कायद्यांअंतर्गत नोंदवण्यात आला आहे. त्या दिवशी चौकशी पूर्ण झाले नसल्याने आज ईडीने पुन्हा एकदा त्यांना समन्स पाठवले आहे. झारखंड मध्ये सध्या झारखंड मुक्ती मोर्चा पक्षाचे सरकार आहेत. या पक्षाचे अध्यक्ष असलेले हेमंत सोरेन हे मुख्यमंत्री आहेत. सोरेन यांनी झारखंडमधील सरकार अस्थिर करण्यासाठी तपास यंत्रणांचा वापर केंद्रातील भाजपा सरकारने केला असल्याचा आरोप केला आहे.
या महिन्याच्या सुरुवातीला, तपास यंत्रणांनी राज्यातील कथित बेकायदेशीर खाणकामाच्या मनी लॉन्ड्रींगच्या चौकशीचा भाग म्हणून सोरेन यांचे माध्यम सल्लागार, साहिबगंज जिल्ह्यातील अधिकारी आणि माजी आमदार यांच्या जागेवर छापे टाकले होते.ईडी २०२२ पासून राज्यातील बेकायदेशीर खाणकामातून निर्माण झालेल्या १०० कोटी रुपयांच्या गुन्ह्याची चौकशी करत आहे. तपास यंत्रणांनी आतापर्यंत या प्रकरणात १४ लोकांना अटक केली आहे. ज्यामध्ये २०११ च्या बॅचचे आयपीएस अधिकारी छवी रंजन यांचा समावेश आहे. रंजन यांनी राज्याच्या समाज कल्याण विभागाचे संचालक आणि रांचीच्या उपयुक्त म्हणून काम केले होते.
