भाजप आमदार गणपत गायकवाड यांनी उल्हासनगरमध्ये शिवसेना नेते महेश गायकवाड यांच्यावर गोळीबार केल्याचा प्रकार समोर आला आहे. गणपत गायकवाड यांनी उल्हासनगर येथील हिल लाईन पोलीस स्थानकात वरिष्ठ पोलीस निरीक्षकांच्या केबिनमध्येच महेश गायकवाड यांच्यावर गोळीबार केला. या प्रकरणी पोलिसांनी आरोपी गणपत गायकवाड यांच्यासह तिघांना अटक केली आहे. आपसांतील वैमनस्य आणि जमिनीचा वाद यातून हा प्रकार घडल्याची घटना समोर आली आहे.
आता या प्रकरणावर उपमुख्यमंत्री देवेंद्र फडणवीस यांनी मोठी घोषणा केली आहे. या गोळीबार प्रकरणाची चौकशी ही गुन्हे शाखेकडून करण्यात येईल, असा निर्णय देवेंद्र फडणवीस यांनी जाहीर केला आहे. त्यामुळे आता या संपू्र्ण प्रकरणाची उच्चस्तरीय चौकशी होणार आहे.
या गोळीबार प्रकरणी आमदार गणपत गायकवाड, संदीप सर्वांकर, हर्षल केणे यांना पोलिसांनी अटक केली आहे. जमिनीच्या वादातून हा गोळीबार केल्याची माहिती पोलिसांनी दिली आहे. या गोळीबारात महेश गायकवाड यांच्यासह दोन जण जखमी झाले आहेत. तसेच पोलीस स्थानकात हा प्रकार घडल्याने अनेक प्रश्न उपस्थित केले जात आहेत.
