मराठा आंदोलक मनोज जरांगे पाटील आणि राज्याचे अन्न आणि नागरी पुरवठा मंत्री छगन भुजबळ यांच्या आरोप-प्रत्यारोपांचे सत्र सुरूच आहे. काही दिवसांपूर्वीच मनोज जरांगे पाटलांनी छगन भुजबळांवर निशाणा साधला होता. भुजबळांनी राजीनामा दिला तर दिला, आम्हाला काय त्याच्याशी? आम्ही ओबीसीमधूनच आरक्षण घेणार आहोत. तसेच भुजबळांनी आधी तलाठी व्हावे, असा टोला जरांगेंनी लगावला होता. तर जरांगेंच्या या टोल्यावर छगन भुजबळांनी प्रत्युत्तर दिले आहे. मला निवडणूकीचे सांगू नको, तू आधी नीट उभा राहा, अशी टीका भुजबळांनी केली आहे.
माध्यमांशी संवाद साधताना छगन भुजबळ म्हणाले की, मनोज जरांगेंना सांगा की तू आधी ग्रामपंचायतीला उभा राहा. छगन भुजबळ फक्त ग्रामपंचायत नाही तर मुंबईच्या महानगरपालिकेत 25 वर्ष निवडून येऊन दोन वेळा महापौर झाला आहे. तसेच दोन वेळा आमदार देखील झाला आहे. त्यानंतर येवल्याला चारवेळा आमदार झाला. त्यामुळे तू मला सांगण्याची गरज नाही. आधी तू नीट उभा राहा.
मनोज जरांगे आमच्यामध्ये फूट पाडत आहे. तो कधी म्हणतो नाभिक समाजाच्या बाजूने लढणार आहे. तर कधी म्हणतो धनगरांच्या बाजूने लढणार. अरे तू तर आमच्या धनगर आणि नाभिक समाजाच्या आरक्षणावर डल्ला मारण्याचे काम करत आहे. ते आधी तू थांबव, खूप उपकार होतील आमच्यावर. तुझे ओबीसीतून आरक्षण घेण्याचे काम चालले आहे. ते तू मागे घे, आम्ही तुझे उपकार मानू, असेही छगन भुजबळ म्हणाले.
