कॉमेडीचा बादशाह कपिल शर्मा (Kapil Sharma) पुन्हा एकदा त्याचा नवा शो ‘द ग्रेट इंडियन कपिल शो’ (The Great Indian Kapil Show) घेऊन आला आहे. या शोचा पहिला भाग प्रेक्षकांना खूप आवडला आहे. या शोचा दुसरा भागही शनिवारी प्रसारित करण्यात आला.

यावेळी द कपिल शोमध्ये क्रिकेट दिग्गज श्रेयस अय्यर (Shreyas Iyer) आणि रोहित शर्मा (Rohit Sharma) सहभागी झाले आहेत. तर श्रेयस अय्यर आणि रोहित शर्मा या दोघांनी मिळून शोमध्ये धमाल उडवली आहे. धमाल-मस्तीसोबतच क्रिकेटपटूंनी त्यांची काही गुपितेही उघड केली आहेत.

कपिल शर्मा क्रिकेटपटूंसोबत मस्करी करत होता. यादरम्यान कपिलने श्रेयसला विचारले की, तुम्ही स्टेडियममध्ये कधीही अशी गोंडस मुलगी पाहिली आहे का, जिला पाहण्यासाठी तुम्ही सामना संपल्यानंतर कॅमेरामनकडे गेला होता? याला उत्तर देताना प्रथम श्रेयस नाही म्हणतो, पण नंतर तो त्याला एक प्रसंग सागंतो.

कपिल शर्माच्या शोमध्ये त्याचे रहस्य उघड करताना श्रेयस अय्यरने सांगितले की, एकदा त्याला स्टेडियममध्ये बसलेली एक मुलगी आवडली आणि त्याने मॅचदरम्यान तिला हाय देखील केले होते.