शिवसेना ठाकरे गटाचे नेते आणि आपल्या वक्तव्यांमुळे चर्चेत असणारे खासदार संजय राऊत यांनी विद्यमान खासदार आणि अमरावतीच्या भाजपाच्या लोकसभेच्या उमेदवार नवनीत राणा यांच्यावर टीका केली. टीका करताना यावेळी संजय राऊतांची जीभ घसरली आहे. या टीकेला खासदार नवनीत राणा आणि आमदार रवी राणा यांनी जोरदार प्रत्युत्तर दिले आहे. माझ्यावर टीका करताना त्यांनी आपल्या आईकडे आणि मुलीकडे पाहायला हवे होते असे नवनीत राणा म्हणाल्या.
दरम्यान संजय राऊतांनी केलेल्या टीकेला नवनीत राणा यांनी चोख पलटवार केला आहे. यावेळी त्या म्हणाल्या, ”संजय राऊत कोण आहे? सीतेला देखील भोग चुकले नाहीत. आपण तर राजकारणात आहे. ज्या मुलीचे कन्यादान केले आणि ज्या आईने जन्म दिला त्यांच्याकडे पाहायला हवे होते. एखादी महिला बाहेर येऊन काम करते, मात्र तिचा स्वाभिमान विकत नाही. मी तर अमरावतीची सून आहे. माझ्यासोबत अमरावतीच्या प्रत्येक महिलेचा स्वाभिमान जोडला गेला आहे.”
काय म्हणाले होते संजय राऊत?
लोकसभा निवडणुकीच्या तोंडावर संजय राऊतांनी नवनीत राणांवर खालच्या पातळीवर जाऊन टीका केली होती. ”ज्या बाईने मातोश्रीला आव्हान देण्याचा प्रयत्न केला, त्यामध्ये घुसण्याचा प्रयत्न केला. मातोश्री आणि हिंदुत्वाबद्दल अपशब्द वापरले. त्या बाईचा पराभव करणे हे शिवसैनिकांचे प्रथम कर्तव्य आहे. ती नाची, डान्सर, बबली तुम्हाला खुणावेल. पडद्यावरून इशारे करेल. पण भुरळून जाऊ नका.”
