Jitendra Awhad Threat : काही दिवसांपूर्वीच बॉलिवूडचा भाईजान सलमान खानच्या (Salman Khan) मुंबईतील घराबाहेर गोळीबार करण्यात आला होता. या गोळाबाराची जबाबदारी बिष्णोई गँगकडून (Bishnoi Gang) घेण्यात आली होती. तसंच या प्रकरणी पोलिसांनी दोघांना अटक केली आहे. या घटनेनंतर सगळीकडे एकच खळबळ उडाली होती. आशातच आता आणखी एक अशीच घटना समोर आली आहे. बिष्णोई गँगने सलमान खाननंतर आता राष्ट्रवादी काँग्रेस शरद पवार गटाते नेते जितेंद्र आव्हाड यांना निशाण्यावर घेतले आहे. या गँगने जितेंद्र आव्हाड (Jitendra Awhad) यांना धमकी दिली आहे. त्यामुळे पुन्हा एकदा सगळीकडे खळबळ उडाली आहे.

बिष्णोई गँगकडून जितेंद्र आव्हाड यांना धमकीचा फोन आला आहे. धमकी देणाऱ्याने आव्हाडांकडून लाखो रूपयांची खंडणी मागितली आहे. तसेच पैसे दिले नाही तर सलमान खान सारखे होणार, असे धमकी देणाऱ्याने म्हटले आहे. तसेच आरोपीने आपले नाव रोहित गोदारा असल्याचेही सांगितले आहे. हा धमकीचा फोन ऑस्ट्रेलियातून आला आहे.

धमकीचा फोन आल्यानंतर जितेंद्र आव्हाड आता पोलीस ठाण्यात तक्रार दाखल करणार आहेत. तसेच मुंबई पोलीस या प्रकरणातील आरोपींना लवकरात लवकर शोधून बेड्या ठोकतील, अशी अपेक्षा राष्ट्रवादी काँग्रेस शरद पवार गटाच्या पदाधिकाऱ्यांनी व्यक्त केली आहे.