Pune News : सध्या संपूर्ण देशभरात लोकसभा निवडणुकीची रणधुमाळी सुरू आहे. आत्तापर्यंत मतदानाचे दोन टप्पे पूर्ण झाले आहेत. तर या दोन्ही टप्प्यात हवे तेवढे मतदान झालेले नाहीये. त्यामुळे या कमी मतदानाचा फटका कोणाला बसणार? याचा निकाल 4 जून रोजी जाहीर होणार आहे. दुसरीकडे, दोन्ही टप्प्यात कमी मतदान झाल्याने पुणेकरांनी मतदानाचा टक्क वाढवण्यासाठी अनोखी शक्कल लढवली आहे. जर नागरिकांनी मतदाने केले तर त्यांना 50 रूपयांचे पेट्रोल मोफत मिळणार आहे, अशी अनोखी मोहीम पुणेकरांनी सुरू केली आहे.

‘व्होट कर पुणेकर’ ही अनोखी मोहीम ‘पुणे पेट्रोल डिलर्स असोसिएशन’ने सुरू केली आहे. या मोहिमेअंतर्गत एक लिटर ऑईल खरेदी करणाऱ्यास 50 रूपयांचे पेट्रोल मोफत मिळणार आहे. या मोहिमेत पुणे पेट्रोल डिलर्स असोसिएशनने महा एनजीओ फेडरेशन आणि इतर स्वयंसेवी संस्थांना सोबत घेतले आहे. या मोहिमेनुसार मतदान केल्यानंतर बोटावरील शाई दाखवली आणि एक लिटर ऑईल खरेदी केले तर त्या व्यक्तीला पन्नास रूपयांचे पेट्रोल मोफत मिळणार आहे.

13 मे रोजी पुणे लोकसभेसाठी मतदान होणार आहे. तर 13 मे पासून ते 20 मेपर्यंत ही मोहीम सुरू राहणार आहे, अशी माहिती पेट्रोल डिल्रस असोसिएशनचे अध्यक्ष ध्रुव रूपारेल यांनी दिली आहे.