Prajwal Revanna : माजी पंतप्रधान एचडी देवेगौडा यांचे नातू, कर्नाटकचे खासदार प्रज्वल रेवन्ना (Prajwal Revanna) याचं नाव सेक्स स्कँडलमध्ये (Sex Scandal) समोर आलं आहे. लोकसभा निवडणुकीच्या तोंडावर प्रज्वल यांचा अश्लील व्हिडिओ सोशल मीडियावर मोठ्या प्रमाणात पसरला आहे. त्यामुळे ते चांगलेच वादात अडकले आहेत. अशा परिस्थितीत आता जनता दल सेक्युलरने (JDS) प्रज्वल यांना मोठा धक्का दिला आहे.
प्रज्वल रेवन्ना यांना त्यांचा पक्ष जेडीएसने निलंबित केले आहे. दरम्यान, प्रज्वल यांचे काका आणि जेडीएस नेते एचडी कुमारस्वामी यांनी या प्रकरणावर मोठे वक्तव्य केले आहे.
एचडी कुमारस्वामी यांनी पुतण्या प्रज्वल रेवन्ना यांच्या सेक्स स्कँडलपासून स्वतःला दूर केले आहे. याला प्रज्वल स्वत: जबाबदार आहेत, मग या प्रकरणात संपूर्ण कुटुंबाला का दोषी ठरवले जात आहे, असे एचडी कुमारस्वामी यांचे म्हणणे आहे. तसेच कुमारस्वामी यांनी ही काँग्रेसची चाल असल्याचे म्हटले आहे. माजी पंतप्रधानांना बदनाम करण्यासाठी काँग्रेसने निवडणुकीच्या काळात हे षडयंत्र रचल्याचे त्यांचे म्हणणे आहे.
माध्यमांशी बोलताना एचडी कुमारस्वामी म्हणाले की, हा काँग्रेसचा डाव आहे. काँग्रेस आमच्या कुटुंबाची प्रतिमा डागाळण्याचा प्रयत्न करत आहे. यात माझी किंवा देवेगौडा यांची भूमिका काय आहे? प्रज्वल यांच्या प्रकरणात आम्ही जबाबदार नाही. ही प्रज्वल रेवण्णा यांची वैयक्तिक बाब आहे. ते आमच्या संपर्कात नाहीत.तसेच प्रज्वल यांना सरकारसमोर आणण्याची जबाबदारी सरकारची आहे, असे कुमारस्वामी म्हणाले.
दरम्यान, 24 एप्रिल रोजी प्रज्वल रेवन्ना यांचा एक अश्लील व्हिडिओ समोर आला होता. हा व्हिडिओ समोर आल्यानंतर प्रज्वल जर्मनीला गेले. अशा परिस्थितीत प्रज्वल देशातून फरार असून, महिला आयोगाने कर्नाटक सरकारकडे कारवाईची मागणी केली आहे. सरकारने एसआयटी स्थापन करण्याचे आदेश दिले आहेत. तर आता जेडीएसने प्रज्वल यांना पक्षातून निलंबित केले आहे.
