Amit Shah : केंद्रीय गृहमंत्री अमित शाह (Amit Shah) यांनी सेक्स स्कँडल (Sex Scandal) प्रकरणावरून काँग्रेस नेत्या प्रियांका गांधी (Priyanka Gandhi) यांच्यावर निशाणा साधला. हे सहन केलं जाऊ शकत नाही, असं अमित शाह यावेळी म्हणाले. त्यांनी आज आसाम गुवाहाटीमध्ये एका पत्रकार परिषदेला संबोधित केलं.
यावेळी अमित शाह यांनी प्रज्वल रेवन्न यांच्या सेक्स स्कँडल प्रकरणावरून काँग्रेसवर जोरदार हल्लाबोल केला. ते म्हणाले, “हे सहन केलं जाणार नाही. देशातील मातृशक्ती सोबत भाजप पक्ष आहे. त्यामुळे हा अपमान आम्हाला मान्य नाही.
कर्नाटकात सरकार कोणाचे आहे? या प्रकरणी आत्तापर्यंत काँग्रेस सरकारने कोणावर कारवाई का केली नाही? प्रियांका गांधींनी आपल्या सरकारला प्रश्न विचारावा, कारवाई का झाली नाही? असं अमित शाह म्हणाले.
पुढे ते म्हणाले की, भाजपला सर्व राज्यांमध्ये मोठं यश मिळत आहे. दक्षिण भारतात भाजपला चांगला प्रतिसाद मिळत आहे. तर काँग्रेसकडून आमच्या 400 पार लक्ष्याचा दावा ट्विस्ट करण्याचा प्रयत्न सुरू आहे. भाजप 400 पार गेल्यानंतरच देशाचं संविधान संपवणार आणि आरक्षण संपवणार असा काँग्रेसकडून प्रचार केला जात आहे. पण या दोन्ही गोष्टी तथ्यहीन आणि निराधार आहे, असंही अमित शाह म्हणाले.
