Sharad Pawar : आज (3 मे) दिवसभर अपघातांचं सत्र सुरूच आहे. कारण आज सकाळी ठाकरे गटाच्या नेत्या सुषमा अंधारे यांना महाड येथे घेण्यासाठी आलेल्या हेलिकॉप्टरचा अपघात झाला. यामध्ये सुदैवाने कोणतीही जीवितहानी झाली नाही. तर आज दुपारी अकोला जिल्ह्यातील पातूर येथे आमदार किरण सरनाईक यांच्या भावाच्या गाडीचा भीषण अपघात झाला. या अपघातामध्ये किरण सरनाईक यांच्या कुटुंबातील चार जणांचा मृत्यू झाला आहे. या घटनेने सगळीकडे खळबळ उडाली असतानाच आता आणखी एका अपघाताची बातमी समोर आली आहे. आता शरद पवार यांच्या ताफ्यातील गाड्या एकमेकांवर आदळल्याने मोठा अपघात झाला आहे.
शरद पवारांच्या ताफ्यातील गाड्यांचा भीषण अपघात झाल्याची माहिती समोर आली आहे. शरद पवार यांच्या ताफ्यातील दोन वाहने एकमेकांवर आदळून अपघात झाला असल्याची प्राथमिक माहिती समोर आली आहे. ही अपघाताची घटना जळगाव जिल्ह्यात घडली आहे.
शरद पवार हे आज जळगाव जिल्ह्याच्या दौऱ्यावर आहेत. तर ते चोप़डा येथील सभा आटोपून भुसावळकडे जात असताना त्यांच्या वाहनाच्या समोर गतीरोधक आल्याने वाहन चालकाने अचानक वाहनाची गती कमी केली. त्यामुळे मागील येणाऱ्या वाहनांना अंदाज न आल्याने ताफ्यातील शेवटी येत असलेल्या एका वाहनाने समोरील वाहनास जोरात धडक दिली. या धडकेत दोन्ही वाहनांचे मोठे नुकसान झाले आहे. दरम्यान, या अपघातात सुदैवाने कोणीही जखमी झालेले नाही.
