Riteish Deshmukh : आज (7 मे) लोकसभा निवडणुकीसाठी मतदानाचा तिसरा टप्पा पार पडत आहे. आजच्या या तिसऱ्या टप्प्यात 11 राज्यातील एकूण 93 जागांवर मतदान होत आहे. तर आज सकाळी मतदानाला सुरूवात झाली असून अनेक सामान्य जनतेसह अनेक दिग्गज नेते, सेलिब्रिटी मतदानासाठी केंद्राकडे निघाले आहेत. यामध्ये आता अभिनेता रितेश देशमुखने त्याच्या कुटुंबियांसोबत मतदानाचा हक्क बजावला.
लातूर येथील बाबळगाव मतदान केंद्रावर रितेश देशमुखने त्याची आई वैशाली देशमुख आणि पत्नी जिनिलीया देशमुख यांच्यासोबत मतदान केलं. मतदान केल्यानंतर रितेशने जनतेला मतदान करण्याचे आवाहन केले.
“आजचा दिवस हा अत्यंत महत्त्वाचा आहे. सर्वांनी मतदान करावं. आई-वडील, मित्र, कुटुंबातील सर्वांना घेऊन मतदान केंद्रावर जा आणि मतदान करा”, असं आवाहन रितेश देशमुखने केले आहे.
पुढे तो म्हणाले की, “मी आजच्या दिवसासाठी मुंबईहून लातूरला मतदानासाठी आलो आहे. आज ऊन आहे त्यामुळे त्रास तर होणारच. पण थोडा त्रास आपण आपल्या देशासाठी घ्यायला पाहिजे. मतदानासाठी जाणं हा त्रास आहे असं वाटत असेल तर आजचा दिवस त्रास सहन करा”, असंही रितेश देशमुख म्हणाला.
