Sangeeth Sivan Passed Away : नुकतीच सिनेसृष्टीतून एक दु:खद बातमी समोर आली आहे. प्रसिद्ध दिग्दर्शक संगीत सिवन यांचं निधन झालं आहे. ते 65 वर्षांचे होते. त्यांच्या निधनानं बॉलिवूडसह दाक्षिणात्य सिनेसृष्टीला मोठा धक्का बसला आहे.

संगीत सिवन यांनी काल (8 मे) सायंकाळी अखेरचा श्वास घेतला. त्यांच्या निधनांनंतर संपूर्ण बॉलिवूडमध्ये शोककळा पसरली आहे. तसेच अनेक कलाकारांनी सोशल मीडियावर पोस्ट शेअर करत शोक व्यक्त केला आहे. यामध्ये अभिनेता रितेश देशमुखने पोस्ट शेअर करत शोक व्यक्त केला आहे.

रितेश देशमुखने सोशल मीडियावर पोस्ट शेअर करत म्हटलं आहे की, “संगीत सिवन सर आज आपल्यात नाहीत हे कळल्यावर खूप दुःख झाले आणि धक्का बसला. एक नवोदित कलाकार म्हणून तुमच्यावर विश्वास ठेवावा आणि काम करण्याची संधी मिळावी. एक उत्तम माणूस, उत्तम व्यक्तिमत्व आणि मृदू स्वर म्हणजे संगीत सिवन. आज माझे हृदय तुटले आहे, तसेच त्यांचे कुटुंब आणि प्रियजन, त्यांची पत्नी, मुले, भाऊ यांच्याबद्दल माझ्या मनापासून संवेदना. मला तुमची आठवण येईल दा !”, असं म्हणत रितेशने दु:ख व्यक्त केलं आहे.

संगीत सिवन हे एक प्रसिद्ध दिग्दर्शक म्हणून ओळखले जायचे. त्यांनी फक्त बॉलिवूडच नाही तर दाक्षिणात्य चित्रपटांचंही दिग्दर्शन केलं आहे. त्यांनी अपना सपना मनी मनी, क्या कूल है हम, यमला पगला दिवाना यासारख्या सुपरहिट चित्रपटांचं दिग्दर्शन केलं आहे.