Satish Joshi Passed Away : मराठी सिनेसृष्टीतून एक दु:खद बातमी समोर आली आहे. ज्येष्ठ अभिनेते सतीश जोशी यांचं निधन झालं आहे. रंगोत्सवामध्ये स्टेजवरच सतीश जोशी यांनी अखेरचा श्वास घेतला आहे. त्यामुळे मराठी सिनेसृष्टीवर शोककळा पसरली आहे.
अभिनेते राजेश देशपांडे यांनी सोशल मीडियावर पोस्ट शेअर करत सतीश जोशी यांच्या निधनाच्या वृत्ताला दुजोरा दिला आहे. राजेश देशपांडे यांनी पोस्टमध्ये म्हटले आहे की, “आमचे मित्र आणि ज्येष्ठ अभिनेते सतीश जोशी यांचे आज रंगोत्सवात स्टेजवर दु:खद निधन झालं आहे. जाण्यापूर्वी त्यांनी अभिनय पण केला होता, ओम शांती ओम”, असं देशपांडेंनी पोस्टमध्ये लिहिलं आहे.
राजेश देशपांडेंनी पोस्ट शेअर करताच अनेकांनी सतीश जोशी यांना श्रद्धांजली वाहिली आहे. दरम्यान, सतीश जोशी हे प्रसिद्ध अभिनेत्यांपैकी एक होते. त्यांनी अनेक मराठी चित्रपट आणि मालिकांमध्ये काम केलं आहे. तसेच त्यांनी त्यांच्या उत्कृष्ट अभिनयानं प्रेक्षकांच्या मनात स्थान निर्माण केलं आहे. मात्र, आता त्यांच्या निधनानं मराठी सिनेसृष्टीला आणि प्रेक्षकांना मोठा धक्का बसला आहे.
