Ravindra Dhangekar Pune Porsche Accident : पुणे पोर्शे अपघात प्रकरणावरून मोठ्या प्रमाणात संताप व्यक्त केला जात आहे. या प्रकरणातील आरोपींना कठोर शिक्षा व्हाही, अशी मागणी लोकांकडून केली जात आहे. यामध्ये आता काँग्रेस आमदार रविंद्र धंगेकर यांनी पुणे पोलिसांवर गंभीर आरोप केले आहेत. त्यामुळे सगळीकडे एकच खळबळ उडाली आहे.

आमदार रविंद्र धंगेकर हे आज पोलीस आयुक्तालयासमोर आंदोलनाला बसले आहेत. या आंदोलनादरम्यान धंगेकरांनी गंभीर आरोप केले आहेत. या अपघात प्रकरणात पोलिसांनी पैसे खाल्ले असल्याचा आरोप त्यांनी केला. तसेच पुणे पोलीस आयुक्त आमितेश कुमार यांनी बदली करावी, अशी मागणी देखील त्यांनी केली आहे.

यावेळी रविंद्र धगेंकर म्हणाले, या प्रकरणामध्ये करोडो रूपयांचा व्यवहार एका रात्रीत झाला आहे. कारण एका बिल्डरचा मुगला पोलीस स्टेशनमध्ये पिझ्झा पार्टी करतो आणि लाल कारपेट टाकून तो घरी जातो. त्याचे पालकही पोलीस स्थानकात मालकासारखे वावरत होते, त्याचे सीसीटीव्ही फुटेज समोर आले आहे. धक्कादायक म्हणजे, जी मुले मृत्यूमुखी पडली त्यांच्या पंचनाम्यासाठीही पोलीस आले नव्हते.

आत्ताचे सरकार या प्रकरणातील गुन्हेगारांच्या पाठीशी आहे. ज्या प्रकारे पुणे पोलीस या अपघात प्रकरणाचा तपास करत आहे त्याप्रमाणे या तपासात अनेक त्रुटी ठेवल्या आहेत. या प्रकरणात दोन एफआयर बनवण्यात आले. जेव्हा पुणेकर रस्त्यावर आले तेव्ही गृहमंत्री फडणवीस इथे आले आणि त्यांनी पुणेकरांची समजूत काढण्यासाठी दुसरी एफआयर दाखल केली. पण, आता तपास अधिकाऱ्यांवर पहिला गुन्हा दाखल केला पाहिजे. जर गुन्हा दाखल केला नाही तर मी दररोज वेगवेगळ्या ठिकाणी आंदोलन करणार आहे, असा इशारा धंगेकरांनी दिला.

या प्रकरणात पोलीस आयुक्तालयामध्ये मोठ्या प्रमाणात पैसे पोहोचतात. पोलीस खात्यावर पैशांच्या पाकिटाचं वजन आहे. पोलिसांनी हे प्रकरण पैसे हातात घेतल्याशिवाय हाताळलं नाही. नेमकी कुठल्या हॉटेलमध्ये डील झाली?, नेमके कुणाला फोन केले? या सर्व गोष्टींचा तपास केला पाहीजे, अशी मागणीही धंगेकरांनी केली आहे.