Delhi Baby Care Centre Fire : शनिवारी (25 मे) रात्री राजकोटमध्ये एका गेमिंग झोनमध्ये भीषण आग लागल्याची घटना घडली. या आगीच्या घटनेत 28 जणांचा मृत्यू झाला असून अनेक लोक अद्याप बेपत्ता आहेत. या घटनेनं सगळीकडे खळबळ उडाली असतानाच आता अजून एक आगीची घटना घडली आहे. दिल्लीतील विवेक विहार भागात एका बेबी सेंटरला आग लागली. या दुर्घटनेत 7 नवजात बालकांचा दुर्दैवी मृत्यू झाला आहे.
शनिवारी रात्री विवेक विहार भागातील बेबी केअर सेंटरला आग लागल्याची घटना घडली. दिल्ली अग्निशमन विभागाने दिलेल्या माहितीनुसार, ही आग रात्री 11.32 वाजता लागली होती. या घटनेची माहिती मिळताच अग्निशमन दलाच्या 9 गाड्या तातडीनं घटनास्थळी दाखल झाल्या. तसेच ही आग नेमकी कशामुळे लागली याचे कारण अद्याप समजलेले नाहीये. पोलीस सध्या या घटनेचा तपास करत आहेत.
या आगीच्या घटनेदरम्यान अग्निशमन दलाने 12 नवजात बालकांना तातडीनं बाहेर काढत त्यांना लगेच दुसऱ्या रूग्णालयात हलविण्यात आले. तर या घटनेत सात बालकांचा मृत्यू झाला असून एक बालक व्हेंटिलेटरवर आहे. तसेच या दुर्घटनेतील मृत बालकांच्या नातेवाईकांनी एकच टाहो फोडला. ही परिस्थिती पाहून उपस्थित अधिकाऱ्यांचे मन हेलावले होते.
