Dhadak 2 : अभिनेता ईशान खट्टर आणि अभिनेत्री जान्हवी कपूर यांचा ‘धडक’ हा चित्रपट चांगलाच गाजला होता. या चित्रपटातून ईशाने आणि जान्हवीने बॉलिवूड सिनेसृष्टीत पदार्पण करत आपल्या उत्कृष्ट अभिनयाने प्रेक्षकांच्या मनात स्थान निर्माण केलं आहे. तर धडक या चित्रपटानंतर आता त्याचा दुसरा पार्ट लवकरच प्रेक्षकांच्या भेटीस येणार आहे.

नुकतीच निर्माता करण जोहरने ‘धडक 2’ ची घोषणा केली आहे. करणने या धडक 2 चे मोशन पोस्टर सोशल मीडियावर शेअर केले आहे. तर हे पोस्टर शेअर करत करणने लिहिले आहे की, “यह कहानी है थोड़ी अलग क्यूंकि एक था राजा, एक थी रानी – जात अलग थी…ख़तम कहानी.”

करणने शेअर केलेल्या या पोस्टरमध्ये एका भिंतीवर प्रेमाचं वर्णन करणारी काही वाक्ये लिहिलेली दिसत आहेत. तसेच त्यानंतर हळूहळू चित्रपटातील मुख्य कलाकारांचे चेहरे रिव्हील होतात. तर हे मोशन पोस्टर सोशल मीडियावर व्हायरल होताच चाहत्यांना या चित्रपटाची उत्सुकता लागली आहे.

या चित्रपटाच्या सिक्वेलमध्ये प्रेक्षकांना नवीन जोडी पाहायला मिळणार आहे. या चित्रपटात अभिनेत्री तृप्ती डिमरी आणि अभिनेता सिद्धार्थ चतुर्वेदी हे दोघं मुख्य भूमिकेत दिसणार आहे. त्यामुळे ही नवीन जोडी पाहण्यासाठी चाहते उत्सुक झाले आहेत. दरम्यान, धडक 2 चे दिग्दर्शन दिग्दर्शक शाझिया इकबाल करणार आहेत. तर करण जोहरची धर्मा प्रोडक्शन कंपनी या चित्रपटाची निर्मिती करणार आहे. तसेच 22 नोव्हेंबर 2024 रोजी हा चित्रपट प्रदर्शित होणार आहे.