Nagpur Hit And Run Case : पुण्यातील कल्याणीनगर परिसरात घडलेल्या अपघाताचे प्रकरण ताजे असतानाच आता नागपूरातही एक मोठी अपघात घडला आहे. नागपुरमधील शारद चौक येथे दोन महिला मॉर्निंग वॉकला गेल्या होत्या. त्यावेळी एका भरधाव कारने या महिलांना मागून जोरात धडक देत उडवल्याची घटना घडली आहे. या घटनेत एक महिला लांब फेकली गेली आणि त्या महिलेला त्याच कारने पुन्हा चिरडलं असल्याचा धक्कादायक प्रकार समोर आला आहे.
ही घटना 7 मे रोजी घडली असून ती सीसीटीव्हीमध्ये कैद झाली आहे. तर या अपघाताला बरेच दिवस होऊन गेले असूनही पोलिसांनी आरोपींचा शोध घेतला नसल्याची माहिती समोर आली आहे. तर याबाबत पोलिसांना विचारले असता कारचालकाचा आम्ही शोध घेत असल्याचं पोलिसांकडून सांगितलं जात आहे, अशी माहिती अपघातातील महिलांनी दिली आहे.
धक्कादायक बाब म्हणजे पोलिसांनी अपघातग्रस्त कुटुंबियांना त्या गाडीचा नंबर दिसत नाही त्यामुळे तुम्हीचा आम्हाला गाडीचा नंबर शोधून द्या, असं सांगितलं आहे. तर तुम्ही गाडीचा नंबर शोधून द्या आम्ही कारवाई करतो, असंही पोलिसांनी म्हटल्याचं अपघातग्रस्त कुटुंबियांनी सांगितलं आहे. या धक्कादायक प्रकारानंतर नागपूरमध्ये एकच खळबळ उडाली आहे.
