Maharashtra Politics : लोकसभा निवडणुकीच्या निकालानंतर महाराष्ट्रात मोठा भूकंप होणार असल्याची शक्यता वर्तवली जात आहे. कारण नुकतीच एक मोठी माहिती समोर आली आहे. राज्यात पुन्हा एकदा शिवसेनेत फूट पडणार असल्याचं म्हटलं जात आहे. शिवसेना एकनाथ शिंदे यांच्या गटातील अनेक खासदार हे उद्धव ठाकरेंच्या संपर्कात असल्याचं म्हटलं जात आहे.
सूत्रांनी दिलेल्या माहितीनुसार, मुख्यमंत्री एकनाथ शिंदेंच्या शिवसेनेचे अनेक खासदार उद्धव ठाकरेंच्या संपर्कात आहेत. महाराष्ट्रात शिवसेनेला 7 जागा मिळाल्या आहेत. तर मिळालेल्या माहितीनुसार, सातपैकी निम्म्याहून अधिक खासदार उद्धव ठाकरेंच्या संपर्कात आहेत.
महाराष्ट्रात काही महिन्यांनी विधानसभेच्या निवडणुका होणार आहेत आणि अशातच इंडिया आघाडीने ज्या प्रकारे मोठा विजय मिळवला आहे, त्यामुळे शिंदे यांच्या नेत्यांचे धाबे दणाणले आहेत. त्यामुळे आता उद्धव ठाकरे शिंदेंचे खासदार फोडून एनडीएला धक्का देऊ शकतात. तसेच याआधी मंगळवारी शरद पवारांनी जेडीयू आणि टीडीपीशी संपर्क साधल्याचा दावा सूत्रांनी केला होता.
यंदा भाजपच्या नेतृत्वाखालील एनडीएला बहुमत मिळाले आहे. मात्र, यावेळी अनेक राज्ये अशी होती जिथे एनडीए आणि भाजपची कामगिरी फारशी चांगली नव्हती. त्यापैकी महाराष्ट्रामध्ये भाजप चांगली कामगिरी करू शकला नाही. तर येथे भाजप-शिवसेना-राष्ट्रवादीचाही समावेश असलेल्या राज्य पातळीवर स्थापन झालेल्या महायुतीला केवळ 17 जागा मिळाल्या आहेत. यामध्ये भाजपला 9, शिवसेनेला 7 तर राष्ट्रवादीला 1 जागा मिळाली आहे. तर आता सूत्रांनी दिलेल्या माहितीनुसार, एकनाथ शिंदेंच्या गटातील सातपैकी निम्म्याहून अधिक खासदार उद्धव ठाकरेंच्या संपर्कात आहेत. त्यामुळे आता पुन्हा एकदा शिवसेनेत फूट पडणार का? हे पाहणे महत्त्वाचे ठरणार आहे.
