मंगळवारी (11 जून) संध्याकाळी जम्मू-काश्मीरच्या कठुआ जिल्ह्यात झालेल्या चकमकीत CRPF चा एक जवान शहीद झाल्याची घटना घडली आहे. तर या हल्ल्यात दोन दहशतवादी ठार झाले आहेत.
कठुआ जिल्ह्यातील सैदा सुखल गावात पहाटे 3 वाजताच्या सुमारास लपलेल्या दहशतवाद्याने केलेल्या गोळीबारात सीआरपीएफ जवान कबीर दास गंभीर जखमी झाले, असे अधिकाऱ्यांनी सांगितले. जखमी झाल्यानंतर जवान कबीर दास यांना रुग्णालयात नेण्यात आले. मात्र, त्यांचा उपचारादरम्यान मृत्यू झाला.
अधिकाऱ्यांनी दिलेल्या माहितीनुसार, दहशतवाद्यांनी जम्मूपासून 60 किमी अंतरावर असलेल्या गावात सुरक्षा घेरा तोडण्यासाठी अंदाधुंद गोळीबार केला. मंगळवारी संध्याकाळी दहशतवाद्यांनी आंतरराष्ट्रीय सीमेजवळील गावावर हल्ला करून एका नागरिकाला जखमी केले. त्यानंतर शोध मोहिमेदरम्यान एका दहशतवाद्याचा खात्मा करण्यात आला, तर बुधवारी या भागात अजूनही कारवाई सुरू असताना दुसरा दहशतवादी मारला गेला. दहशतवाद्यांनी सीमेपलीकडून घुसखोरी केल्याचे समजते.
