सध्या राज्यात स्फोट झालेल्या अनेक घटना घडताना दिसत आहेत. बुधवारी डोंबिवलीतील एक कंपनीत भीषण स्फोट झाला होता. ही घटना ताजी असतानाच आता नागपूरातही अशीच एक घटना घडली आहे. आज नागपूरमध्ये एका स्फोटतं बनवणाऱ्या कंपनीमध्ये स्फोट झाला असून यामध्ये तीन कामगारांचा मृत्यू झाला आहे. तर या घटनेत सातजण जखमी झाले आहेत.
मिळालेल्या माहितीनुसार, नागपूर जिल्ह्यातील ठामणा येथे चारमुंडी नावाची स्फोटकं बनवणारी कंपनी आहे. या कंपनीत आज दुपारी दीडच्या सुमारास भीषण स्फोट झाला, ज्यामध्ये तिघांचा मृत्यू झाला आहे. तर सातजण जखमी असून त्यातील तिघांची प्रकृती चिंताजनक आहे. सध्या या घटनेतील जखमींना रूग्णालयात दाखल करण्यात आलं असून त्यांच्यावर उपचार सुरू आहेत.
या घटनेची माहिती मिळताच अग्निशमन दलाच्या गाड्या तातडीनं घटनास्थळी दाखल झाल्या असून सध्या आग विझवण्याचा प्रयत्न सुरू आहे. तसेच घटनास्थळी पोलीस देखील दाखल झाले आहेत.
