अभिनेत्री आणि खासदार कंगना रणौतला सुरक्षा तपासणी करताना सीआयएसएफ महिला कॉन्स्टेबल कुलविंदर कौरने कानशिलात लगावली होती. कंगनाने शेतकऱ्यांच्या आंदोलनाबाबत वादग्रस्त वक्तव्य केलं होतं, त्याचाच राग मनात ठेवून कुलविंदर कौरने तिच्या कानशिलात लगावली होती. तर आता कंगनाच्या या कानशिलात मारल्याच्या घटनेचे पडसाद राजकारण आणि चित्रपटसृष्टीतही उमटू लागले आहेत. अनेकांकडून चंदीगड विमानतळावर घडलेल्या या घटनेचा निषेध करण्यात आला. तर अनेक सेलिब्रिटी देखील कंगनाच्या समर्थनात आले आहेत.
यामध्ये आता कंगना राणौतच्या कानशिलात मारण्याच्या घटनेवर निर्माता करण जोहरची पहिली प्रतिक्रिया आली आहे. विशेष म्हणजे करण जोहरची प्रतिक्रिया लक्ष वेधून घेणारी ठरली आहे.
कंगना आणि करणमध्ये छत्तीसचा आकडा आहे. कंगना ही तिच्या स्पष्ट बोलण्यासाठी ओळखली जाते. तिनेच बॉलिवूडमधील घराणेशाहीचा मुद्दा उपस्थित केला होता. तर याआधी कंगना रणौतने उघडपणे करण जोहरला टार्गेट केले आणि त्याला घराणेशाहीसाठी जबाबदार धरले होते. यादरम्यान आता कंगनाच्या कानशिलात मारल्याच्या घटनेवर करण जोहरने प्रतिक्रिया दिली आहे.
सध्या करण जोहरच्या ‘किल’ चित्रपटाच्या प्रदर्शनाची तयारी सुरू आहे. या चित्रपटाचा ट्रेलर 12 जून रोजी रिलीज झाला होता. ट्रेलर लाँच कार्यक्रमाला करण जोहरही उपस्थित होता. जिथे त्याला कंगना राणौतच्या कानशिलात मारल्याच्या प्रकरणावर प्रश्न विचारण्यात आला. ज्यावर करणनेही असे उत्तर दिले की ते ऐकून लोकांना टाळ्या वाजवाव्या लागल्या. करण जोहर म्हणाला की, “मी कोणत्याही प्रकारच्या हिंसाचाराचे समर्थन करत नाही, मग ती शाब्दिक असो किंवा शारीरिक असो.” सध्या करण जोहरची ही प्रतिक्रिया चांगलीच चर्चेत आहे.
