सध्या मुकेश अंबानी आणि नीता अंबानी यांचा धाकटा मुलगा अनंत अंबानी यांच्या लग्नाची जोरदार चर्चा सुरू आहे. अनंत अंबानी पुढच्या महिन्यात 12 जुलैला राधिका मर्चंटसोबत लग्नगाठ बांधणार आहे. तर या लग्नापूर्वी नुकतीच अनंत आणि राधिकासाठी दुसरी प्री-वेडिंग पार्टी आयोजित करण्यात आली होती, जी इटलीत क्रूझवर होती. हा प्री-वेडिंग सोहळा चार दिवस चालला. यावेळी क्रूझवर बॉलिवूडपासून हॉलिवूडपर्यंतचे अनेक स्टार्स उपस्थित होते. आता या सोहळ्याचे फोटो सोशल मीडियावर व्हायरल होत आहेत.
व्हायरल झालेल्या या फोटोंमध्ये राधिका मर्चंटने सर्वांचे लक्ष वेधून घेतले आहे. राधिकाने फंक्शनमध्ये अनेक सुंदर ड्रेस परिधान केले होते. तिचे सर्व लूक्स अप्रतिम असले तरी राधिकाच्या एका गाऊनने लोकांना खूप प्रभावित केले आहे.
राधिका मर्चंटचा हा अनोखा गाऊन खूपच खास होता. हा कोणताही सामान्य गाऊन नव्हता, तिने विशेषत: प्री-वेडिंगसाठी तो कस्टमाइझ केला होता. हा गाऊन तयार करण्यासाठी रॉबर्ट वुन यांनी खूप मेहनत घेतली आहे. राधिकाच्या या गाऊनवर अनंत अंबानींनी दिलेले प्रेमपत्र छापले होते. राधिकाने एका मासिकाच्या मुलाखतीदरम्यान या प्रेमपत्राचा उल्लेख केला होता. तिने सांगितले होते की, या गाऊनवर छापलेले प्रेमपत्र तिला अनंतने तिच्या 22 व्या वाढदिवसाला दिले होते. या पत्रात अनंतने राधिका आपल्यासाठी किती महत्त्वाची आहे, याबाबत भावना व्यक्त केल्या आहेत. याच कारणामुळे तिच्या खास दिवशी राधिकाने हे प्रेमपत्र तिच्या गाऊनमध्ये कस्टमाईज केले होते.
राधिकाच्या संपूर्ण लुकबद्दल बोलायचे झाले तर ती या ब्लॅक अँड व्हाइट ऑफ-शोल्डर कस्टमाइज्ड गाउनमध्ये खूपच सुंदर दिसत होती. यासोबतच तिने या गाउनवर डायमंड मल्टीलेअर नेकपीस कॅरी केला होता. तर अनंतच्या लूकबद्दल सांगायचे झाले तर, त्याने राधिकासोबत त्याचा लूक मॅच केला होता. अनंतही काळ्या रंगाच्या टक्सिडो सूटमध्ये खूपच सुंदर दिसत होता. तर सध्या दोघांचे काही फोटो सोशल मीडियावर व्हायरल होत आहेत, ज्यावर नेटकऱ्यांनी मोठ्या प्रमाणात लाईक्सचा वर्षाव केला आहे.
