पंतप्रधान नरेंद्र मोदी आणि इटलीच्या पंतप्रधान जॉर्जिया मेलोनी यांची शुक्रवारी (14 जून) G-7 शिखर परिषदेत भेट झाली. पंतप्रधान मोदी इटलीच्या अपुलिया भागातील बोर्गो एग्नाझिया रिसॉर्टमध्ये G7 शिखर परिषदेत पोहोचले तेव्हा त्यांचे स्वागत इटलीच्या पंतप्रधान जॉर्जिया मेलोनी यांनी केले.
पंतप्रधान मोदी आणि जॉर्जिया मेलोनी यांची जेव्हा भेट झाली तेव्हा दोघांनी एकमेकांना नमस्कार केला. नमस्काराने सुरू झालेल्या दोघांमधील या संवादाचे फोटो सध्या सोशल मीडियावर व्हायरल होत आहेत. विशेष म्हणजे या भेटीपासून ट्विटरवर #मेलोडी ट्रेंड धुमाकूळ घालत आहे.
वास्तविक, सोशल मीडियावर व्हायरल होत असलेल्या #मेलोडी या ट्रेंडची सुरुवात खुद्द इटलीच्या पंतप्रधान जॉर्जिया मेलोनी यांनी केली होती. तो सप्टेंबरपासून अनेक वेळा ट्रेंड झाला आहे. भारताने गेल्या वर्षी G20 शिखर परिषदेचे आयोजन केले होते. यामध्ये जागतिक नेत्यांचा सहभाग होता. या काळात पीएम मोदी आणि जॉर्जिया मेलोनी यांच्यातील मैत्री चर्चेत होती.
दुसरीकडे, मेलोनी यांनी त्यांच्या इंस्टाग्राम आणि एक्स हँडलवर पंतप्रधान मोदींसोबत एक सेल्फी पोस्ट केला आणि ‘#मेलोडी’ हॅशटॅगसह पोस्टला कॅप्शन दिले, “COP28 चे चांगले मित्र.” दोन्ही नेत्यांची आडनावे एकत्र करून हा हॅशटॅग तयार करण्यात आला आहे. त्यानंतर जेव्हाही दोन्ही नेते भेटतात तेव्हा #मेलोडीचा ट्रेंड येतो.
दरम्यान, भारताला G7 शिखर परिषदेसाठी एक आउटरीच देश म्हणून आमंत्रित करण्यात आले आहे. या शिखर परिषदेत सहभागी होण्यासाठी पंतप्रधान नरेंद्र मोदी इटलीला पोहोचले आहेत. तिसरा कार्यकाळ सुरू केल्यानंतर पंतप्रधान नरेंद्र मोदी यांचा हा पहिलाच विदेश दौरा आहे.
