जम्मू-काश्मीरमधील दहशतवादाविरुद्धची लढाई निर्णायक टप्प्यात आहे. अलीकडील घटनांवरून असे दिसून येते की दहशतवादाला आता अतिरेकी हिंसाचाराच्या अत्यंत संघटित कृत्यांपासून केवळ छुप्या युद्धापर्यंत मर्यादित रहायला भाग पडत आहे. आता हे देखील मुळापासून उखडून टाकण्याचा आमचा निर्धार आहे, असे केंद्रीय गृह मंत्री अमित शाह आज म्हणाले आहेत.
शाह यांच्या अध्यक्षतेखाली आज नवी दिल्लीत जम्मू आणि काश्मीरमधील सुरक्षा परिस्थितीबाबत उच्चस्तरीय आढावा बैठक झाली. या बैठकीला राष्ट्रीय सुरक्षा सल्लागार अजित डोवाल, जम्मू-काश्मीरचे नायब राज्यपाल मनोज सिन्हा, लष्करप्रमुख जनरल मनोज पांडे, केंद्रीय गृहसचिव, गुप्तचर विभागाचे संचालक, लष्कर प्रमुख (नियुक्त) लेफ्टनंट जनरल उपेंद्र द्विवेदी यांच्यासह सीएपीएफचे महासंचालक, मुख्य सचिव, जम्मू-काश्मिरचे पोलिस महासंचालक आणि इतर वरिष्ठ अधिकारी उपस्थित होते.
जम्मू विभागात क्षेत्र वर्चस्व योजना आणि शून्य दहशतवाद योजनेद्वारे काश्मीर खोऱ्यात मिळालेल्या यशाची पुनरावृत्ती करण्याचे निर्देश केंद्रीय गृहमंत्र्यांनी सुरक्षा यंत्रणांना दिले. पंतप्रधान नरेंद्र मोदी यांच्या नेतृत्वाखालील सरकार नाविन्यपूर्ण माध्यमातून दहशतवाद्यांचा मुकाबला करून आदर्श घालून देण्यासाठी कटिबद्ध असल्याचे शाह यांनी प्रतिपादन केले.
असुरक्षित क्षेत्रे ओळखून अशा क्षेत्रांच्या सुरक्षेची चिंता दूर करणाऱ्या सुरक्षा यंत्रणांमधील अखंड समन्वयावर शाह यांनी भर दिला. पंतप्रधान नरेंद्र मोदी यांच्या नेतृत्वाखाली दहशतवादाविरुद्ध शून्य सहिष्णुता धोरणाचा पुनरुच्चार करत सरकार जम्मू-काश्मीरमधून दहशतवादाचा नायनाट करण्यासाठी कोणतीही कसर सोडणार नाही असेही ते म्हणाले आहेत.
भारत सरकारच्या प्रयत्नांमुळे काश्मीर खोऱ्यात दहशतवादी कारवायांमध्ये लक्षणीय घट होऊन मोठे सकारात्मक परिणाम मिळाले आहेत. काश्मीर खोऱ्यातील पर्यटकांच्या वाढत्या विक्रमी संख्येवरून, इथे कायदा आणि सुव्यवस्थेत झालेली सुधारणा दिसून येत असल्याचे त्यांनी नमूद केले. जम्मू आणि काश्मीरमध्ये विक्रमी मतदान घडवून आणलेल्या लोकसभा निवडणुका यशस्वीपणे पार पाडल्याबद्दल शाह यांनी सुरक्षा यंत्रणा आणि जम्मू-काश्मीर प्रशासनाचे कौतुक केले.
