उत्तर काश्मीरमधील बारामुल्ला जिल्ह्यातील सोपोरमधील रफियााबाद भागात बुधवारी दहशतवादी आणि सुरक्षा दलांमध्ये चकमक सुरू होती. या काळात सुरक्षा दलांनी २ दहशतवाद्यांचा खात्मा केला आहे. मात्र, या कारवाईत एक जवान जखमी झाला असल्याचे समजते आहे. दरम्यान काही दिवसांपूर्वी लष्कराने बंदिपुरा येथे ए ग्रेड यादीत असणाऱ्या दहशतवाद्याचा खात्मा केला आहे.
बुधवारी सकाळी सोपोरच्या हडीपोरा येथील लिसार भागात दहशतवादी असल्याची माहिती मिळाल्यानंतर पोलीस, लष्कर आणि सीआरपीएफच्या संयुक्त पथकाने घेराबंदी आणि शोध मोहीम सुरू केली. दुपारी या भागात लपलेल्या दहशतवाद्यांनी सुरक्षा दलांना जवळ येताना पाहून गोळीबार केला, त्यानंतर चकमक सुरू झाली. दोन्ही बाजूंनी जोरदार गोळीबार सुरू होता. मंगळवारी क्यूआरटी वाहनातील लष्कराच्या जवानांनी शहरातील वीर भूमी पार्कच्या गेटबाहेर एक संशयास्पद बॅग जप्त केली. या बॅगेतून लष्कराचा गणवेश, टी-शर्ट, पायजमा आणि एसएलआरचे काडतूस सापडले.
