तामिळनाडूतील कल्लाकुरिची जिल्ह्यातील करुणापुरम येथे गुरुवारी रात्री बनावट दारू पिऊन आठ जणांचा मृत्यू झाल्याने बनावट दारूच्या दुर्घटनेतील मृतांची संख्या ४७ वर पोहोचली आहे. पीडितांमध्ये चार महिलांचा समावेश देखील आहे. सर्वाधिक बळी हे करुणापुरम येथील आहेत. या घटनेतील १०० हून अधिक पीडितांवर कल्लाकुरीची शासकीय वैद्यकीय महाविद्यालय आणि इतर रुग्णालयात उपचार सुरू आहेत. प्रत्येकजण श्वास घेण्यास त्रास, अंधत्व आणि शरीरात तीव्र वेदनांच्या तक्रारी करत आहे. विषारी दारू घोटाळ्यातील बळींच्या मृत्यूची संख्या सातत्याने वाढत असताना, सर्वांचे सामूहिक अंत्यसंस्कार करण्यात आले आहेत.
या घटनेनंतर राज्यातील स्टॅलिन सरकारच्या अडचणीत मोठ्या प्रमाणात वाढ झाली आहे. या घटनेची जबाबदारी घेऊन विरोधी पक्ष मुख्यमंत्री स्टॅलिन यांच्या राजीनाम्याची मागणी करत आहेत. राज्याचे भाजप नेते अन्नामलाई यांनी गृहमंत्री अमित शहा यांना पत्र लिहून या घटनेची सीबीआय चौकशीची मागणी केली आहे. राज्य सरकारने या घटनेच्या सीआयटी चौकशीचे आदेश दिले आहेत. राज्यातील द्रमुक सरकार दारू विक्रेत्यांशी हातमिळवणी करत असल्याचा आरोप करत अण्णामलाई यांनी आपल्या पत्रात म्हटले आहे की, पक्षाच्या लोकांच्या इशाऱ्यावर बेकायदेशीर दारू तयार आणि विकली जात आहे. त्यांनी दारू घोटाळ्यातील पीडित आणि त्यांच्या कुटुंबीयांची भेट घेतली. त्यांनी २२ जून रोजी स्टालिन सरकारच्या विरोधात राज्यव्यापी निदर्शने करण्याची घोषणा केली आहे.
तामिळनाडूच्या माजी मुख्यमंत्री जयललिता यांच्या सहाय्यक शशिकला म्हणाल्या की, राज्य सरकारने मृत्यूची जबाबदारी स्वीकारली पाहिजे. दरवर्षी मृत्यूचे प्रमाण वाढत आहे. तर AIADMK सरचिटणीस पलानीस्वामी यांनी सांगितले की सुमारे २०० लोक बाधित आहेत, तर १३३ उपचार घेत आहेत. दुसरीकडे, पीएमकेचे अध्यक्ष अंबुमणी रामदास आज कल्लाकुरिची मेडिकल कॉलेज हॉस्पिटलमध्ये दाखल झालेल्या लोकांची भेट घेणार आहेत.
