सौदी अरेबियात हजला जाणाऱ्या लोकांचा उष्णतेमुळे मृत्यू झाल्याच्या प्रकरणात मोठा खुलासा झाला आहे. आतापर्यंत १००० हून अधिक यात्रेकरूंना आपले प्राण गमवावे लागले असून त्यात ९० भारतीयांचा समावेश आहे. प्रचंड उकाडा आणि उष्णतेमुळे त्यांचा मृत्यू झाल्याचे सांगण्यात येत आहे. मक्कामधील तापमान ५० अंशांच्या पुढे गेले असून उष्माघाताने लोकांचा मृत्यू होत असल्याचे सांगण्यात येत आहे. मात्र याप्रकरणी आता मोठा खुलासा झाला आहे. अनेक देशांनी खुलासा केला आहे की हज दरम्यान मृत्युमुखी पडलेल्या लोकांपैकी बहुतेक लोक हे होते जे काही महिन्यांपूर्वी टुरिस्ट व्हिसा किंवा व्हिजिट व्हिसाद्वारे सौदी अरेबियात आले होते. सर्वाधिक मृत्यू इजिप्शियन लोकांमध्ये आहेत.
द गार्डियनच्या वृत्तानुसार, १७ जून रोजी मक्काच्या ग्रँड मशिदीत ५१.८ अंश सेल्सिअस तापमान नोंदवले गेले. सौदी अरेबियाच्या अधिकाऱ्यांच्या म्हणण्यानुसार, मक्कामध्ये हवामान बदलाचा खोलवर परिणाम होत आहे. येथील सरासरी तापमान दर १० वर्षांनी ०.४ अंश सेल्सिअसने वाढत आहे. मागील वर्षी हजला गेलेल्या २४० यात्रेकरूंचा मृत्यू झाला होता. यातील बहुतांश इंडोनेशियातील होते. सौदीने सर्व प्रवाशांना छत्री वापरण्याचा सल्ला दिला आहे. याशिवाय त्यांना सतत पाणी पिण्यास आणि सूर्यप्रकाश टाळण्यास सांगितले जात आहे. या वर्षी सुमारे १८ लाख यात्रेकरू हजसाठी दाखल झाले आहेत. यापैकी १६ लाख लोक इतर देशांतील आहेत.
