मुंबईतील (Mumbai )मालवणी परिसरातील हृदयस्पर्शी घटना समोर आली आहे. एका 34 वर्षीय व्यक्तीने आपल्या पत्नीवर ॲसिड फेकून हल्ला केल्याची धक्कादायक घटना घडली आहे. मालाड येथे आपल्या आईच्या घरी ही 27 वर्षीय महिला राहत होती. याठिकाणी जाऊन बुधवारी सकाळी या महिलेचा पती 34 वर्षीय शब्बीर खान याने तिच्यावर ॲसिड फेकून हल्ला केला आहे. कूपर रुग्णालयात या महिलेला उपचारासाठी दाखल करण्यात आले आहे. विवाहबाह्य संबंधाच्या वादातून त्याने हा हल्ला केला असल्याची माहिती समोर आली आहे. पोलिसांनी त्याला ताब्यात घेतले आहे. तसेच त्याच्यावर गुन्हा देखील दाखल करण्यात आला आहे.
शब्बीर खान याच्याविरुद्ध कलम १२४(२), ३११, ३३३ आणि ३५२ नुसार गुन्हा दाखल करण्यात आला आहे. या प्रकरणी पोलीस तपास करत आहेत. शब्बीर खान यांच्या पत्नीने त्याला घटस्फोट मागितला होता. दुसऱ्या महिलेसोबत त्याचे प्रेमसंबंध आहेत असा आरोप त्याच्या पत्नीने त्याच्यावर केला होता अशी माहिती अधिकाऱ्यांना मिळालेली आहे. तिने केलेल्या आरोपामुळे त्या दोघांच्यात अनेक वाद झाले होते. यामुळेच ही महिला गेल्या 3 महिन्यांपासून आपल्या आईच्या घरी राहत होती.
दरम्यान, 2019 मध्ये या दोघांचा प्रेमविवाह झाला होता. शब्बीर खान हा बेरोजगार असून त्याला अंमली पदार्थांचे व्यसन असल्याचे देखील तिला समजले होते. यामुळे या दोघांच्यात अनेक वाद झाले होते. या वादातूनच तिच्यावर तिचा पती शब्बीर खान याने ॲसिड हल्ला केला असून या हल्ल्यात ही महिला भाजली गेली आहे. दरम्यान, पोलीस या प्रकरणाचा तपास करत आहेत.
